Концерт (29.08.22)

“Җыр – минем гомерлек юлдашым” дигән циклдан чираттагы музыкаль программа тыңларга чакырабыз. Аның бүгенге чыгарылышы бик тә үзенчәлекле булачак. Игътибарыгызга яшь җырчы Рәмис Габделхәев һәм музыкант Камил Гайнетдинов чыгышы тәкъдим ителә. Алар икесе дә Казан Дәүләт мәдәният һәм сәнгать институты студентлары, әмма сәхнә тормышының ни икәнен бик бәләкәйдән белеп үскән егетләр. Тумышы белән Апас районы Йомралы авылыннан булган Камилнең дә, Биектау районы Өнсә авылы егете Рәмиснең дә әти-әнисе мәдәният өлкәсе белән бәйле кешеләр. Авылдагы бер генә чара да алардан башка үтми. Егетләрнең балачагы да шулай авыл сәхнәләрендә җырлап, төрле музыка уен коралларында уйнап үтә. Мәктәпне тәмамлагач, Камил укуын Казан Дәүләт Мәдәният институтында Наил Сәгъдиев җитәкчелегендәге баян сыйныфында дәвам иттерә. Ә Рәмис исә, шул ук югары уку йортында халык сәнгате нечкәлекләренә төшенә, җырчы Алсу Зәйнетдинова, ягъни Асылъярда вокал буенча дәресләре ала. Күптән түгел генә алар катнашында Татарстан радиосыда күләмле танышу тапшыруы эфирга чыкты. Егетләрнең шулай үзенчәлекле итеп, гитарада башкарылган татар җырларының кавер-версияләре, күп кенә тыңлаучыларның күңеленә хуш килде. Программабызны Татарстан радиосы фонды өчен яздырылган менә шул язмалардан төзедек. Бу язмаларның барысында да җырчы Рәмис Габделхәевкә гитарада Камил Гайнетдинов уйный.

Нашли опечатку? Выделите фрагмент и отправьте нажатием Ctrl+Enter