Пар канатлар (28.06.22)

Сугыш чоры балалары – Казанда яшәүче Тәнзилә Бәдретдин кызы һәм Нәҗип Билалетдин улы Шәраповлар белән тыңлаучыларыбызны таныштыру сәбәпләре чыгып тора. Элек без аларның алтын туйлары турында сөйләгән идек, Тәнзилә апаның Балык Бистәсе районындагы үзе туган Балыклы Чүкәй авылында пенсия акчаларына “Таң чишмәсе”н төзекләндерүе турында да репортаж эшләдек. Ә бу юлы аларны тапшыруга чакыру өчен берничә сәбәп бар. Беренчедән, быел Болгар җирендә Ислам дине кабул ителүнең 1100 еллыгын дөньякүләм зурлап билгеләп үттек. Ә Шәраповлар икесе дә Алланың барлыгына, берлегенә инанып, дини кануннарга буйсынып, тугъры булып яшәүчеләр. Ә 62 ел буена башкаларга үрнәк гаилә башлыгы булган, 5 тапкыр инфаркт кичергән Нәҗип абыйга шушы көннәрдә 90 яшь тулды. Бүген без клиник үлем кичерү, йөрәк тибүдән туктаганда да яшәү дәрте белән фани дөньяга әйләнеп кайту (билгеле, бу хакта кыскача гына тукталырбыз), кайгы-хәсрәтне кичерә алу, катлаулы гаилә тормышының серләре турында сөйләшербез.

Нашли опечатку? Выделите фрагмент и отправьте нажатием Ctrl+Enter