Яңалыклар (16.03.22)

Иртәнге чыгарылыш.

Татарстан Президенты Рөстәм Миңнеханов һәм «Туризм.рф» корпорациясе генераль директоры Сергей Суханов Татарстан Республикасының туристлык инфраструктурасын үстерүдә хезмәттәшлек итү турында килешүгә кул куйды.
ТР Дәүләт Советы каршындагы Яшьләр парламенты утырышы узды.
Бүген Алтынчы чакырылыш Дәүләт Советының утызынчы утырышы була.
Җәмгыятьне берләштерү һәм армиябез гамәлләрен хуплау турында экспертлар милли диаспора вәкилләре, җәмәгать эшлеклеләре — үз фикерләрен белдерә. «Татарстан Республикасы удмуртларының милли-мәдәни автономиясе» төбәк иҗтимагый оешмасы идарәсе рәисе Андрей Герасимов болай диде:
НАТО үз чикләрен киңәйтә, үз сафларына яңа дәүләтләрне кертә. Зеленский атом-төш державасына әйләнергә теләве турында игълан итә, болай да авыр шартларда барысы да катлаулана. 24 февральдә игълан ителгән махсус операция безгә аңлаешлы. Максатлар тәгаенләнгән – Украинаны коралсызландыру һәм милләтчелекне бетерү. Әлеге махсус операция 8 ел дәвам иткән сугышны тәмамларга тиеш.
Социалистик Хезмәт Герое, «Татарстан Геройлары» иҗтимагый оешмасы рәисе урынбасары Любовь Смирнова да хәрби операцияне хуплавын белдерде. «Без үз чикләребезне саклыйбыз. Безгә читнекеләр кирәкми, үзебезнекен дә бирмибез. Вәзгыять, әлбәттә, хәвефле, чөнки Донбасста, Луганскида кешеләр һәлак була. Алар — безнең кешеләр. Әлбәттә, бу — фаҗигале хәл. Тик башка ча чара юк», диде ул.

Көндезге чыгарылыш.

Бу минутларда Алтынчы чакырылыш Дәүләт Советының утызынчы утырышы уза. Сессия эшендә Татарстан президенты Рөстәм Миңнеханов, Премьер-министр Алексей Песошин, Хөкүмәт әгъзалары һәм башкалар катнаша. Утырышта Дәүләт Советы Рәисе Фәрит Мөхәммәтшин рәислек итә.
Россия Тышкы эшләр министрлыгының Кабул итүләр йортында 2022 елда Ислам Хезмәттәшлеге Оешмасының Яшьләр башкаласы буларак Казан шәһәре инаугурациясе узды.
Татарстанда икмәк пешерү тармагына ярдәм итү максатыннан һәм бәяләр кисәк артмасын өчен, җитештерүчеләргә 300 млн сум акча бүлеп биреләчәк.

Радиохисап.

Бүген Алтынчы чакырылыш Дәүләт Советының утызынчы утырышы булды. Сессия эшендә Татарстан президенты Рөстәм Миңнеханов, Премьер-министр Алексей Песошин, Хөкүмәт әгъзалары һәм башкалар катнашты. Утырышны Дәүләт Советы Рәисе Фәрит Мөхәммәтшин алып барды.
Парламент контроле вәкаләтләрен үтәү кысаларында, депутатлар Татарстан Республикасы буенча Эчке эшләр министрының 2021 елда полиция эшчәнлеге турында хисабын тыңлады. Татарстанның эчке эшләр министры Артем Хохорин сүзләренчә, узган елда үтерүләр саны 25 процентка кимегән.
Республикада тулаем җинаятьчелек дәрәҗәсе 4 процентка диярлек кимегән. Полиция хезмәткәрләре 51 меңнән артык җинаять теркәгән, шул исәптән 15 меңе — кискен һәм аеруча кискен җинаятьләр буенча. Күпчелеге Казан, Чаллы, Югары Ослан, Яшел Үзән, Лаеш, Азнакай, Менделеевск районнарына туры килә. «Былтыр эчке эшләр органнары хезмәткәрләре 23 меңнән артык җинаятьнең эзенә төшкән. Үтерүләрне ачыклау 98 процент дәрәҗәсендә», — диде Хохорин.
Утырышта Татарстан Республикасында бала хокуклары буенча вәкаләтле вәкилнең 2021 елда Татарстанда бала хокукларын һәм законлы мәнфәгатьләрен үтәү турындагы доклады каралды. Татарстан Республикасында бала хокуклары буенча вәкаләтле вәкил Ирина Волынец билгеләп үткәнчә, узган ел Балачак унъеллыгын гамәлгә ашыруның бишенче елы булды. «Узган елда республикабыз үсеше өчен күп эш эшләнде, төрле өлкәләрдә эре проектлар гамәлгә ашырылды, шул исәптән безнең балалар мәнфәгатьләрендә дә, — дип билгеләп үтте балалар омбудсмены. Узган ел балалар омбудсмены адресына 2 124 мөрәҗәгать кергән, бу сан 2020 елга караганда 19%ка күбрәк. 357 граждан кабул ителгән. Еш кына балалар омбудсмены янына социаль түләүләр, мәктәпләргә һәм балалар бакчаларына, бигрәк тә ясле төркемнәренә, урнаштыру буенча мөрәҗәгать итәләр, шулай ук мәгариф учреждениеләрендә конфликтлы хәлләр турында мөрәҗәгатьләр дә булган. ТР Дәүләт Советы утырышында Ирина Волынец Татарстан территориясендә балигъ булмаганнарга алкогольсез энергетик эчемлекләр сатуны тыю мәсьәләсен күтәрде. Вәкаләтле вәкил тарафыннан Дәүләт Советы адресына тиешле закон проектын эшләүне сорап мөрәҗәгать юлланды.
Утырышта Татарстан Республикасы Президенты каршындагы Эшмәкәрләрнең хокукларын яклау буенча вәкаләтле вәкилнең 2021 елда эшчәнлеге нәтиҗәләре турында мәгълүматы, «Өстенлек-2030» стратегик академик лидерлык программасы кысаларында 2021 – 2030 елларга «Казан (Идел буе) федераль университеты» югары белем бирү федераль дәүләт автоном мәгариф учреждениесен үстерү программасын гамәлгә ашыру турында һәм 2021 елда Татарстан Республикасының социаль-икътисадый үсешенә керткән өлеш хакында хисап тыңланды.

Нашли опечатку? Выделите фрагмент и отправьте нажатием Ctrl+Enter