Концерт (22.08.2021)

Татарстан радиосында игълан ителгән Р.Яхин музыкасы атналыгын йомгаклыйбыз. Шул уңайдан хәзер без сезне Рөстәм Яхин исемендәге икенче халыкара классик музыка фестивале гала-концерты язмасын тыңларга чакырабыз. Ул  2016 елның ноябрендә Г.Тукай исемендәге Татар Дәүләт филармониясендә үткән һәм сәхнәдән барган вакытта яздырып алынган иде. Бу язмага мөрәҗәгать итүебез юкка түгел, чөнки ул бөек композиторның 95 еллыгына багышлап үткәрелгән иде. Инде бүген, композитор Р.Яхинның тууына 100 ел тулган көннәрдә без аны кабат тыңлаучыларыбыз хәтерендә яңартасыбыз килде. Концертның радиоварианты Татарстан радиосы режиссеры Рамил Һидиятулла һәм музыка белгече Гөлназ Гыйльми тарафыннан әзерләнгән. Бу сәнгать бәйрәмендә дөньякүләм танылган пианистлар СССРның халык артисты Элисио Верцаладзе, Александр Гиндинг, СССРның халык артисты Нани Брегвадзе, Татарстанның һәм Башкортстанның абруйлы сәнгать осталары чыгыш ясаган иде. Хөрмәтле радиотыңлаучылар, хәзер игътибарыгызга тәкъдим ителәчәк Рөстәм Яхин исемендәге икенче халыкара классик музыка фестивале гала-концерты язмасында Рөстәм Абязов җитәкчелегендәге “Ля Примавера” оркестры, Зилә Сөнгатуллина, Рем Урасин, Идрис Газиев, Георгий Ибушев, Резидә Галимова, Филүс Каһиров, Артур Исламов, Эльза Заяри, Юлия Җиһаншина башкаруында мәшһүр композитор әсәрләрен тыңларбыз. Концертның сценарий авторы – Рәмис Аймәт, режиссеры – Илдар Хәйруллин. Танылган актерлар Алсу Каюмова белән Артем Пискунов алып бара.

Нашли опечатку? Выделите фрагмент и отправьте нажатием Ctrl+Enter