Моң керсен күңелләргә (24.04.21)

Халык уен кораллары турында әңгәмә-концерт.

Шушы матур яз иртәсен халык уен кораллары авазлары белән бизәп куярга булдык. Хәзер игътибарыгызга гаҗәеп кызыклы бер язма тәкъдим ителер. Милли уен коралларыбызга багышланган шигырьләр һәм аларда башкарылган әсәрләр бергә үрелеп барачак.

Заманында бу композицияне бөек моң иясе Илһам Шакиров үзе төзеп алып килгән булган! Һәм аны мөхәррир Зиннур Насыйбуллин белән режиссер Гоман Әхмәтҗан, тавыш операторы Сания Хамматова бергәләп эфир өчен әзерләгәннәр.

Язма шул ягы белән үзенчәлекле, биредә уен коралларына бернинди дә электрон эшкәртү кертелмәгән, алар, нәкъ тормыштагыча, саф, табигый булып ишетеләләр. Тыңлаганда үзеңне егетләр гармун тартып узган авыл урамнарында, Сабан туе мәйданнарында итеп  күз алдына китерәсең.

Язманың тагын бер бәһале сыйфаты шунда – аны данлыклы дикторларыбыз Мәрьям Арсланова һәм Фоат Галимуллин алып бара. Димәк, без хәзер туган телебезнең чын эталонын ишетәчәкбез, дигән сүз.

Нашли опечатку? Выделите фрагмент и отправьте нажатием Ctrl+Enter