Театр — микрофон алдында (01.03.21)

Әхмәт Рәшит. “Әни”. Радиоспектакль. 1 өлеш.

Бүген, 1 нче март – язның тәүге көне. Күңелләрнең зур өметләр белән тулышкан мәле. Әлбәттә, яздан һәркем җылылык, наз, изге өметләрнең аклануын көтә. Бик тиздән, тагын бер атнадан язның беренче бәйрәмен – 8 нче Март – Халыкара хатын-кызлар көнен билгеләп үтәчәкбез. Инде күптәннән килгән күркәм гадәт буенча бу бәйрәм халык арасында Әниләр көне буларак та танылып китте. Юкка гына күренекле шагыйребез Такташ:

“Хатын-кызның бөтен матурлыгы ,

Бөтен күрке – Ана булуда”, — дип язмагандыр.

Әни, әнием, әнкәй, инәй… Бөек татар теленең нинди генә шиваләрендә яңгырамасын, бу сүзгә күпме җылылык, хөрмәт, дан сыйган. Кешегә гомер бүләк итүче анага нинди генә матур сүзләр әйтсәк тә аз булыр күк. Шагыйрьләребез арасында да үз әнисе турында язмаган, уйламаган, фикер әйтмәгән кеше бар микән ул? Юктыр, мөгаен. Аналар турындагы һәр иҗат җимеше – шигырь, чәчмә яки драма әсәреме, җыр булсынмы – барысы да изге, саф хисләр белән сугарылган. Хәзер без тыңлаячак радиопоспектакль дә  менә шундый әсәрләрнең берсе. Аның авторы – шагыйрь, озак еллар Татарстан радиосында мөхәррир булып эшләгән Әхмәт Рәшит. Әсәр магнитофон тасмасына Татарстан радиосы студиясендә режиссер Әлфия Гыйләҗи, тавыш операторы Асия Бикбау тарафыннан 1990 нчы елларда язып алынган. Рольләрне Г.Камал исемендәге Татар Дәүләт академия театры артистлары: Илдус Әхмәтҗан, Нәҗибә Ихсанова, Ирек Баһманов, Хәлим Җәләлов, Әсхәт Хисмәт, Фәридә Сафина, Люция Хәмитова, Әнисә Сабирова һәм Аграфена Васильева башкаралар.

Нашли опечатку? Выделите фрагмент и отправьте нажатием Ctrl+Enter