Әдәбиятыбыз сәхифәләре (25.01.21)

Фатыйх Әмирхан. “Фәтхулла хәзрәт”. Моноспектакль. Дәвамы.

Язучы, драматург, күренекле әдип, сөекле шагыйребез Габдулла Тукайның якын дусты һәм фикердәше – Фатих Әмирханның тууына 135 ел. Шул уңайдан, хөрмәтле радиотыңлаучылар, бүген без сезне “Классик әдәбиятыбыз үрнәкләре” дигән циклдан күренекле язучының Татарстан китап нәшрияты әзерләп чыгарган аудиокитапка нигезләнеп, мөхәррир Рөстәм Акъегет һәм режиссер Рамил Һидиятулла тарафыннан эшләнгән “Фәтхулла хәзрәт” дигән моноспектакльнең дәвамын тыңларга чакырабыз.

Билгеле булганча, бу әсәр Россиядә революцион күтәрелеш башланып, татар зыялыларының милләтнең киләчәгенә зур өметләр баглаган чорда язылган. Шушы өмет-ышанычларны чагылдырган “Фәтхулла хәзрәт” повестендә язучы хыялында бер кадимче мулланы яңадан терелтеп, 42 елдан соң булачак татар тормышына алып керә. Форсаттан файдаланып, шуны да әйтеп үтик, Фатих Әмирхан фантаст язучы булып саналмаса да, 1909 елда язылган бу әсәрендә язучы, әдәбиятта, хәтта әле дөнья әдәбиятында беренче булып смартфон һәм видеоэлемтәне тасвирлаган әдип. Моңа әлегә ышанып җитмәүчеләр булса, әсәрне тыңлагач, бу фикердән кире кайтырлар дип уйлыйбыз.

Әсәрне Татарстанның атказанган артисты Фәнис Җиһанша укый.

Нашли опечатку? Выделите фрагмент и отправьте нажатием Ctrl+Enter