Әдәбиятыбыз сәхифәләре (07.11.20)

Фоат Галимуллин. “Бәләкәй Фоат”. Моноспектакль.

7 ноябрь – безнең өчен дә, күпсанлы тыңлаучыларыбыз өчен дә истәлекле көн. Нәкъ менә шушы көнне ерак 1927 елда татар кешесе үз күңеленә якын авазларны ишетә. “Тыңлагыз, Казан сөйли!” дигән сүзләр була бу. Шушы еллардан соң күпме вакыт үткән, күпме сулар аккан. Татарстан радиосы бүген дә күп санлы тыңлаучыларын үзенең тирән мәгънәле, фәһемле тапшырулары белән сөендерүен дәвам итә.

“Казан сөйли!” шушы 2 сүздән торган гыйбарәдә күпме мәгънә бар! Бу сүзләр авыр сугыш елларында халкыбызны зур батырлыкларга чакырган, хезмәткә өндәгән. Бүген эфирдан ишетелгән “Казан сөйли” – ил-көннең тыныч булуы, республикабыздагы тормыш иминлеге күрсәткече дә ул. Болар турында фәлсәфәгә бирелеп китүебез очраклы түгел, чөнки хәзер Сезнең игътибарга тәкъдим ителәчәк тапшыруның баш каһарманы өчен дә “Казан сөйли!” дигән сүзләр тормышында гаять зур урын алып тора. Ул күпләргә якын, үз кеше – Фоат Галимуллин. Аның Татарстан радиосына килүе, мондагы хезмәт юлы турында тыңлаучыларыбыз берникадәр мәгълүматлы. Ә бәләкәй Фоат ул нинди булган? Бүген сүз шул турыда. Игътибарыгызга галим һәм язучы, күренекле диктор Фоат Галимуллинның үзе укуында автобиографик фактларга нигезләнгән әсәрен тәкъдим итәбез.