“Җиде көн”. 21 март.

Атналык күзәтү.

Дөньяның күпчелек илләре өчен берничә ай дәвамында иң актуаль тема булган коронавирус бу атнада республикабызда да көнүзәк мәсьәләгә әйләнде. Алга киткән илләрнең макроикътисады җимерелүе, Россия акча берәмлегенең кыйммәте төшүе  һәм кешеләрнең сәламәтлегенә янаган куркыныч бу көннәрдә берәүне дә битараф калдырмагандыр. Коронавирус үтеп кергән илләр үз территорияләрендә авыруның таралуын кисәтү максатыннан күпсанлы чикләүләр кертте. Хәзер әлеге чаралар белән республикабыз халкы да якыннан таныша башлады. Россиядә алдан ук кисәтү эшенә тотынганга күрә, вәзгыять  Кытайдагы кебек үк булмас дигән өмет бар.

         Татарстанда 15 апрельгә кадәр махсус санитар-эпидемиологик режим кертелде, ул массакүләм чараларны күчерүне күздә тота. Әле кичә генә Татарстан Президенты Рөстәм Миңнеханов яңа коронавирус инфекциясе таралу куркынычы белән бәйле рәвештә республика территориясендә югары әзерлек режимын кертү турындагы Күрсәтмәгә  кул куйды.

         Бу атнада Россия Президенты Владимир Путин Конституциягә төзәтмәләр кертүне хуплау мәсьәләсе буенча 22-нче апрельгә гомумроссия тавыш бирүен билгеләү турында Указга кул куйды. Ләкин бу дата  эпидемиологик вәзгыятькә бәйле рәвештә күчерелергә мөмкин.

Нашли опечатку? Выделите фрагмент и отправьте нажатием Ctrl+Enter