22 апрель — Конституциягә төзәтмәләр кертү буенча тавыш бирү көне.

Татарстаннан сайланган Россия Дәүләт Думасы депутаты Ольга Павлова «Татар-информ» мәгълүмат агенлыгы журналистына Россия Конституциясендә Совет халкының 1941-1945 еллардагы Бөек Ватан сугышында җиңүе турындагы тарихи дөреслекне яклауга бәйле төзәтмәләр ни өчен мөһим булуын сөйләде.

         «Бүген бик күп чит ил сәясәтчеләре тарихны яңадан язарга һәм совет халкының 1941-1945 еллардагы Бөек Ватан сугышында җиңүен бәхәсләргә телиләр. Алар өчен көчле Россия, җиңүче Россия кирәкми. Хәтта бу хакта уйлау да  аларны ярсыта кебек. Сәяси мәнфәгатьләрен өстенрәк куеп, алар бу куркыныч сугышның бөтен милләтләрне юкка чыгара алганын танымаска  тырыша. Советлар Союзына бу тарихи Җиңү өчен кыйммәт түләргә туры килә: анда 41 миллион кеше һәлак була», — дип аңлатты парламентарий.

         Аның сүзләренә караганда, Бөек Җиңү бәйрәме алдыннан, сугыш кырларында көрәшкән ватандашларыбызның истәлеге  өчен, Ватанны саклаганда халык батырлыгының әһәмиятен РФ Конституциясендә аерым төзәтмә белән беркетү мөмкинлеге барлыкка килде, һәм депутатлар моны эшләделәр.

         Россия Дәүләт Думасы депутатлары 11 мартта пленар утырышта Россия Конституциясенә төзәтмә турында РФ Законы проектын өченче, ахыргы укылышта кабул итте. Кертелгән төзәтмәләрнең берсе Россия Федерациясенең Ватанны саклаучылар истәлеген олылавы, тарихи дөреслекне саклауны тәэмин итүе турында сөйли. Халкыбызның Ватанны саклаганда күрсәткән  батырлыгының  әһәмиятен киметү рөхсәт ителми.

Нашли опечатку? Выделите фрагмент и отправьте нажатием Ctrl+Enter