Татарстан депутатлары РФ Конституциясенә төзәтмәләр кертү турында федераль законны карады. 12 март.

 Бүген алтынчы чакырылыш Дәүләт Советының сигезенче утырышында  Татарстан Президенты Рөстәм Миңнеханов, Дәүләт Киңәшчесе Минтимер Шәймиев, премьер-министр Алексей Песошин, республика Хөкүмәте  әгъзалары, Дәүләт Думасы депутатлары, Федерация Советы әгъзалары һәм башкалар катнашты. Утырышны Дәүләт Советы рәисе Фәрит Мөхәммәтшин алып барды.

       Депутатлар Россия Федерациясе  Конституциясенә төзәтмәләр кертү турында федераль законны карады. Исегезгә төшереп үтәбез,  кичә Федерация Советы РФ Конституциясенә төзәтмәләр кертү турындагы законны хуплаган иде. Аннары ул алга таба карау өчен төбәкләргә тапшырылды.

         Конституциягә төзәтмәләр кертү турындагы Закон кабул ителүгә бәйле рәвештә Татарстан Республикасы Дәүләт Советы депутатлары Россия Президенты Владимир Путинга мөрәҗәгать кабул итте.

         Төбәкләр карарларын раслау өчен Федерация Советы 14 март көнне кабат җыелачак.  РФ Конституциясен үзгәртү турындагы закон проекты буенча гомумроссия тавыш бирү көне 22 апрельдә була.

Нашли опечатку? Выделите фрагмент и отправьте нажатием Ctrl+Enter