11 нче июньдә Татарстанда бердәм дәүләт имтиханының төп чоры тәмамланды. Ә 21 нче июньгә кадәр өстәмә көннәр билгеләнгән.
Нәтиҗәләрне 6 июньнән башлап 26 сына кадәр җиткерәләр.
Әйтик, Түбән Кама районында җиде чыгарылыш сыйныф укучысы химия фәне буенча 100 балл җыйган. Алар барысы да 35 нче лицейда белем ала. Бу республика буенча иң яхшы күрсәткеч булып санала.
Менә алар — 35 нче лицейның горурлыгы. Җиде чыгарылыш сыйныф укучысы БДИдан 100 балл җыйган. Барысы да химия фәнен сайлаганнар. Өй эшен даими эшләп барырга, әзерләнергә һәм тырышырга… Боларны башкарсаң, югары күрсәткечләргә ирешергә була, ди Камилә Гыйльмуллина. Үсмер кыз тормышын медицина белән бәйләргә тели.
Химия буенча имтихан ике өлештән тора.
Беренчесендә – 28 бирем, икенчесендә – алты. Аларны үтәү өчен 3 сәгать ярым вакыт бирелә. 35 нче лицейда 100 балл туплаган укучылар ел саен була, тик быел рекорд куйганнар. Бу, әлбәттә, укытучылар тырышлыгы, ди белем бирү йорты директоры.
Быел 35 нче лицейны 104 укучы тәмамлый, шуларның кырык дүрте – медальгә дәгъвә кыла.
Альбина Вәлиева, Рафаэль Рәкыйпов, Татарстан яңалыклары, Түбән Кама
