Рәшит Ваһапов исемендәге иҗтимагый фонды милли моңны саклап, татар җыры сәнгатендә яңа офыклар ачуны дәвам итә. “Яңа татар җыры -2” конкурсының гала-концерты «Пирамида» концертлар залында узды. Чарадан безнең репортаж.
«Яңа татар җыры -2” конкурсының гала концерты Кытайдан килгән милләттәшебез Базарбай Бикчәнтәев һәм “Риваять» төркеме башкаруында “Тамырыңны бел, татар” дип исемләнгән җырдан башланды. Җырның сүзләрен Базарбай үзе иҗат иткән, көен — Шәмсия Җиһангирова. Соңрак билгеле булганча әлеге композиөия “Иң яхшы татар җыры” номинациясендә икенче урынга лаек булды.
Хәтерләсәк, бәйге башланыр алдыннан “Бәгырьләрне өтә, киләчәк буыннарга күчә торган җыр кирәк, татарга” дигән сүзләр еш яңгырады. Яңа татар җырында зәвыклы татар җырлары яңгырады. Конкурс Рөстәм Миңнехановның хуплавы һәм ярдәме белән гамәлгә кергән.
Яңа татар җыры-2 саннан сыйфатка күчүе белән үзенчәлекле. Быел бәйгегә 242 җыр килгән, бу исә узган елгы саннан азрак. Сыйфат алга чыга дип ассызыклады Рәшит Ваһапов исемендәге фонд җитәкчесе, бәйгенең оештыручысы Рифат Фәттахов.
Махсус премия лауреатлары исемлегенә барлыгы 12 җыр лаек булды. Алар арасында Ленар Шәех сүзләренә Гөлүзә Зиатдинова иҗат иткән “Яратам” җыры да бар. Бу кичтә аны Айгөл Бариева башкарды.
Ленар Шәех сүзләренә иҗат ителгән тагын бер җыр Иң яхшы балалар җыры номинациясендә җиңү яулады. Туган телем җырының көй авторы Риф Гатауллин.
Ә иң яхшы татар җыры бәйгесенең җиңүчеләре Алсинә Сәләхова сүзләренә Азат Хәлимов иҗат иткән “Әтигә” җыры һәм Илдар Юзеев сүзләренә Ризван Хәлимов иҗат иткән “Сабырлык җыры.
Барлыгы 27 өр яңа җыр дөнья күрде.
Айзилә Батырханова, Динә Нәҗметдинова, Владимир Юрков, Татарстан яңалыклары.
