«Татмедма» акционерлык җәмгыятендә «Язылган өчен шифаханәгә юллама, телевизор һәм башка бүләкләр» бәйгесе нәтиҗәләре буенча бүләкләр тапшыру тантанасы булып узды. 2024 елның беренче яртыеллыгына холдингның ким дигәндә ике басмасына язылырга кирәк иде. Акциядә Татарстаннан кала Башкортстан, Түбән Новгород һәм Самара өлкәләреннән 452 абунәче катнашкан. Барлыгы 17 бүләк уйнатылды. Төп бүләк — «Ижминводы» шифаханәсенә ике кешелек юлламаны Балтач районы кешесе отты.
Татмедиа оешмасы бүләк уйнату традициясе инде дистә еллап гамәлдә. Һәм елдан-ел катнашучылар саны арта, географиясе дә киңәя генә бара. Бу — газета-журналлар тормышыбызда әһәмиятлелеген югалтмый, дигән сүз.
Барлыгы 17 бүләк — «Ижминводы» шифаханәсенә ике кешелек юллама, бер телевизор һәм бер вертикаль тузан суыргыч, икешәр электр иттарткычы, ипи пешерү җайланмасы, термопот һәм шөреп боргыч, шулай ук өч үтүк һәм өч тонометр уйнатылды. Төп бүләккә Балтач районыннан Айдар Зәкиев лаек булды. Әмма Айдар шушы көннәрдә генә контракт төзеп, махсус хәрби операциягә киткән, ә бүләкне аның тормыш иптәше Гөлшат ханым килеп алды.
Әлеге чарада даими катнашучылардан иң өлкәне — Чистайдан Мария Иванова, аңа 96 яшь. Буадан Нәзимә Хөсәенова исә 91 яшен тутырган. Ә менә Фәтхулла абый күп еллар татарча гәҗит-журналларга язылучыларның санын арттыру өстендә эшли, үзе дә яза. Быел бәйгедә беренче тапкыр катнашкан.
Саба районыннан Әнисә Гатиятова, барлыгы 14 басмага язылып, рекордсмен-язылучы булган, ә Спас районыннан Әнвәр Закиров газета-журналларны инде 50 елдан артык яздырып укый. Шулай ук, биредә “ Сөембикә” журналы уздырган бәйге җиңүчеләренә сертификатлар тапшырылды, әлеге ике бәйгедә берьюлы катнашып, ике бүләк оту мөмкинлеге дә бар.
Бүләкләү тантанасы күмәк фото бн тәмамланды. Кызганычка каршы, җиңүчеләрнең барысы да килә алмаган, бүләкләрне редакциягә башка көнне килеп алырга да мөмкин.
Миләүшә Мусина, Александр Решеткин, Татарстан яңалыклары.
