Язгы боз ястык калынлыгы булса да ышанма, дип әйтеп-кисәтеп торсалар да, күп кенә балыкчылар моны колакларына да элми. Коткаручылар шундыйдар өчен кисәтү игъланнары урнаштырды. Урында профилактик әңгәмәләр дә алып бардылар. Рейдка Түбән Камадагы коллегаларыбыз да кушылды.
Коткаручылар кисәтә: язгы боз тиз уалучан, су астына төшеп киткәнеңне сизми дә каласың. Тик әлеге киңәшләргә барлык балыкчылар да колак салмый. Еш кына алар саклык чараларын онытып җибәрәләр. Бу юлы да Пионер күлендә кеше шактый була. Балыкчы Владимир Костромин белдерүенчә, яраткан шөгыле бер чир кебек. Буш вакыт чыгуга, күңел кыбырсына башлый. Анда җыенып чыгып китү- үзе бәйрәм. Көннең үткәне сизелми дә. Шулай да “тыныч ау” яратучыларга тыелып торырга туры киләчәк.
Коткаручылар кисәтә- язгы бозга чыгу куркыныч, чөнки ул көпшәк һәм нык түгел. Төнге кыраудан соң, ышанычлы тоелса да, көндез тиз эри. Юка бозга кергән очракта, аннан кире чыкканда, аягыгызны шудырып, өслектән алмыйча гына чыгыгыз.
