Күрмәүчеләрне тернәкләндерү эше белән бөтен дөньяга билгеле булган “Ярдәм” фонды хәйриячелек өлкәсендә иң актив, абруйлы мөселман оешмаларының берсе. Әле яңа гына балалар өчен оештырган чарада йөздән артык бала катнашты. Ярдәм ишегалдында узган бәйрәмнән хәбәрчебез Мөршидә Җиһан репортажы.
Ул көнне кояш та балалар кебек гел елмаеп торды. Урамда үткән чараларда көннең матур булуы да әһәмиятле.
Бәйрәм башланганчы ук балалар үз күңеленә хуш килгән шөгыль тапты.
Кемдер күңелле паравозда җилдерә, кемдер остаханәләрдә шөгыльләнеп күңела ача. Ярдәм фонды балалар рәхәтләнеп ял итсен өчен бөтен шартларны да тудырырга тырышкан.
Кайда балалар, шунда балалар өчен иҗат итүче Йолдыз Шәрәпова булыр.
Кече Сабан туе рәвешен алган бәйрәмнең төп чарасын Гамил Нур алып барды. Балалар берсен- берсе уздырып корьән аятьләре һәм сурәләр укыды.
Бәйрәмгә килүчеләр каршында чыгыш ясаучы оештыручылар балаларга иң изге теләкләрен җиткерде.
Ишетмәүчеләр өчен тамаша барышын махсус укытучы хәрәкәтләр белән аңлатты. “Ярдәм” дәвалау-укыту тернәкләндерү үзәге директоры Мәликә Гыйльметдинова тарафыннан тәрбиягә алынган сәламәтлеге чикле балалар да бәйрәмдә үзләрен бик яхшы хис итте. Балаларның шат авазларын, бәхетле йөзләрен күреп куанган әти-әниләр оештыручыларга бик рәхмәтле.
Балалар шулай ук төрле бәйгеләрдә катнашып бүләкләр дә алды. Гомумән әлеге бәйрәм һәрбер балага үзе бүләк булды.
Мөршидә Җиһан, Таһир Хәсәнов Татарстан яңалыклары.
