Көннәр суытып, ягу сезоны башлану белән янгын куркынычсызлыгы мәсьәләсе тагын да актуальләшә. Моның белән бәйле киңәш, кисәтүләрне янгын күзәтчелеге бүлеге белгечләре, гадәттән тыш хәлләр министрлыгы вәкилләре күпме генә халыкка җиткереп торса да, кагыйдәләрне үтәмәүчеләр очрый әле. Күп очракта янгыннар игьтибарсызлык аркасында чыга.
Татар Икшермәсе авылыннан Тәслимә Гарипова өендә ялгызы гомер кичерә. Атна саен балаларын мунча ягып каршы ала ул. 86 яшьлек әби өчен янгын куркынычсызлыгы кагыйдәләре беренче урында.
Тормышта янгын белән күзгә –күз очрашканы юк. Алла сакласын ди әби. Өендә дә автоном янгын хәбәрен җиткерүче җайланманы урнаштырган.
Әлеге җайланма төтен исен вакытында сизеп, янгын куркынычы барлыгын көчле тавыш ярдәмендә вакытында хәбәр итә. Максаты йоклаган кешене уяту, игътибарны җәлеп итү. Районда аны барлыгы 1800 дән артык йорт хуҗасы урнаштырган. Статистикага күз салсак, соңгы 2 айда районда 5 мунчада янгын чыккан. Барысы да гади кагыйдаләрне үтәмәгәннән.
Мичләрне артык кыздыру, вакытында янгын сүндерү хезмәтенә хәбәр итмәү дә аяныч хәлләргә китерергә мөмкин. Иң күп янгын быел Шәмәрдән авыл җирлегендә теркәлгән, барлыгы 7 очрак. 5 янгын Эзмә авыл җирлегендә булган. Иске Икшермә янгын сүндерү бүлеге начальнигы Фәнис Сәләхиев командасы 3 янгынны вакытында юк итә, 1 кешенең гомерен саклап калуга ирешкән.
Икшермә янгын сүндерү бүлекчәсе 2009 нчы елдан бирле эшли. Мондыйлар Лесхоз һәм Шәмәрдәндә дә бар. Саннарга тулырак тукталсак, агымдагы елның бу көненә районда 25 янгын чыккан. Шуның 5 се мунча, 6 сы өй, 6 сарай һәм 1 гараж.
Янгынны сүндерүгә караганда , булдырмый калу мөһимрәк. Ни дисәң дә карактан кала, уттан калмый.
Мичләр, электр , газ приборлары, чыбыкларның төзеклеген һәрдаим карап, тикшереп торырга кирәк. Районда халык белән профилактика эшләре даими алып барыла. Белешмәлекләр тапшырылу белән беррәттән кисәтү ммч чаралары аша да даими җиткерелеп тора. Уяулыкны саклап яшик.
