Яңа уку елына да бер атна вакыт калып бара. Татарстанда 1404 белем бирү оешмасы эшли, бу уку елында укучылар саны 450 меңнән артык булачак, беренче сыйныфка 56 меңнән артык бала бара.
Беренче чиратта мәгариф учреждениеләренә янгын куркынычсызлыгы, санитар-эпидемиологик таләпләрне үтәүгә игътибар итәргә кирәк. Бүгенге көндә республиканың барлык мәктәпләре дә автоматлаштырылган янгын саклау системалары белән җиһазландырылган. Шулай ук Татарстанда «Мәктәпкә җыенырга ярдәм ит» республика хәйрия акциясе бара. Аның кысаларында быел 7 меңнән артык беренче сыйныф укучысына ярдәм күрсәтеләчәк. Хәйрия акциясе август ахырына кадәр дәвам итә.Исегезгә төшерәбез, Мәктәпкә җыенырга ярдәм ит» республика акциясе, 2007 елдан башлап, Татарстан Президенты Рөстәм Миңнеханов ярдәме белән үткәрелә.
