Арча районында ике спорт мәйданчыгы ачылды. Яңа объектлар балалар һәм яшүсмерләр өчен тернәкләндерү үзәгендә барлыкка килде.
Чиканас авылында урнашкан әлеге үзәктә мөмкинлекләре чикләнгән балалар һәм яшүсмерләр дәвалана. Мәйданчыкларны үз акчасына Арча иганәчесе Илшат Газизов төзеде. Эшмәкәр үзе дә балачагыннан спорт белән мавыга. Башкаларны да спортка җәлеп итү максаты белән, футбол манежлары һәм спорт мәйданчыклары төзергә булган. Ачылыш тантанасында Илшат Газизовка район башлыгы һәм авылдашлары рәхмәт белдерде. Яңа мәйданчыкларда волейбол һәм футбол буенча турнирлар башланды инде. Ә яшь спортчылар республика ярышларында лаеклы чыгыш ясарга әзерләнә.
