Республиканың авыл хуҗалыгы һәм азык-төлек министрлыгы шәһәр кешеләрен Яңа ел бәйрәменнән соң калган тере чыршыларны терлекләргә азык өчен җыю буенча акциядә катнашырга чакыра. Казанда Идел буе экология компаниясе 10 гыйнвардан чыршыларны кабул итү пунктының эшен оештырып җибәрде инде һәм ул 31 гыйнварга кадәр дәвам итәчәк. Акциядә теләгән һәркем катнаша ала. Моның өчен Яңа ел бәйрәмнәре уңаеннан өйләрдә куелган чыршы, нарат, пихта агачларын һәм ботакларын махсус билгеләнгән урыннарга алып килеп, шунда урнаштырылган контейнерларга салырга кирәк.Кабул итү пунктлары экранда күрштелгән адреслар буенча тәүлек буе эшли.Агачлар бары тик физик затлардан гына кабул ителә, чыршыларны алып килгәнче, башта аларны мишуралардан һәм уенчыклардан чистартырга кирәк.Җыелган агачларның барысы да Югары Ослан районының Шеланга авылындагы фермер хуҗалыкларына һәм Биектау районының Әлдермеш авылына җибәреләчәк.
