Бердәмлек тау күчерә. Бу көннәрдә махсус операциядә катнашучы солдатлар өчен “Солдатка аш” акциясе бара. Әлеге акция райондагы һәр җирлектә көннән көн киңрәк колач белән дәвам итә. Игътибарыгызга Саба Җәмигъ мәчетеннән әзерләнгән репортажны тәкъдим итәбез.
Саба Җәмигъ мәчетендә иртәдән ук эш гөрли. “Солдатка аш” акциясендә катнашучылар — волонтерлар кечкенә капчыкларга аш тутыру белән мәшгуль. Тутырылачак ингридиентлар пешерелгән, туралган, махсус ясалган киптергечтә киптерелгән. Әлеге акциягә кушылырга Сызрань шәһәре волонтерлары этәргеч биргән.
“Солдатка аш” акциясендә катнашучыларның үзләренең социаль челтәрләре бар. Бу аларга эшне тиз арада оештырырга ярдәм итә. Продукция җитмәү ачыкланганда да, аны хәл итү авырлык тудырмады, диләр оештыручылар. Бу очракта шәхси эшмәкәрләрнең ярдәме зур булуны ассызыкладылар.
Саба мәчетендә волонтёрлар, уллары махсус хәрби операциядә булган әниләр кулга кул тотынышып эшли. Алар арасында Шәмәрдәннән бакчачы Илсөяр Кәбирова, Юлбаттан тракторчы булып эшләгән Вәсилә Шәмсетдинова да бар. Шактый күп эшне, мәсәлән киселгән токмачларны, өйдә газ духовкаларында да киптергәннәр.
Ингридиентлардан тыш, аш һәм аны әзерләү тәртибе, кемнәр тарафыннан әзерләнүе турында белешмә язуы да урнаштырылган. Исәп — хисап эшләрен бик зур төгәллек белән Эльвира Каюмова алып бара.
Уллары махсус хәрби операциядә булган әниләр дә изге эштә катнашу өчен кырык эшләрен кырык якка ташлап килгән. Кече Шыңардан Гөлсем Рабгетдинова без бүген монда кызларга булышабыз, ничек эшлисен өйрәнәбез, ә кичен авылдашлар белән дә солдатларыбызга аш әзерлибез, ди. Шулай итеп Шыңар җирлегендә дә күмәкләшеп эшкә керешкәннәр. Туктар авылыннан 4 малай әнисе Фәнзия Хәйбиеваның улы Фәнис Махсус хәрби операциядә, узган ел ахырында гына улы Әнис тә Армия сафларына алынган. Вакыт булуга мондый эшләрдә катнашам, ди ул.
Бу көннәрдә 2000 меңнән артык порция аш пакетларга тутырылды. Гомумән, ике атнада барлыгы 4000 нән артык порция аш әзерләнгән. Шулай ук шактый күләмдә турап ипи дә киптереп пакетларга тутырылган.
Динә Нәҗметдинова, Гөлназ Вәхитова, Рәзил Нигъмәтов, ТЯ,
