«Татмедиа» бинасы янындагы ял итү паркында журналистлар һәм казанлылар өчен «Медиа-Питрау» бәйрәме булып узды. Бәйрәм чарасын үз хәбәрчебез Фәннур Хәсәнов та күреп кайтты.
Матур традициягә әверелгән әлеге бәйрәмне керәшеннәрнең «Туганайлар» мәдәни-агарту газетасы өченче тапкыр оештыра.
Питрау-элек-электән чәчәк бәйрәме, ыру –кардәшләрнең очрашу көне булган. Елның иң матур, иң яшел чәчәккә күмелгән вакыты .Питрау бәйрәме Питрау атнасы-бер атна дәвам итә. Ул Петр һәм Павел апостолларга атап уздырыла торган христианнарның иң зур бәйрәме дип саналса да, әлеге йоланың сәбәбе күпкә тирәндәрәк ята. Борынгы заманнарда керәшеннәрнең башка фин-угыр, төрки халыклары кебек үк, авылларда аерым бер төркем булып яшәгәннәр. Алар, кагыйдә буларак, ел саен, җәен бер тапкыр җыен оештырганнар. Яшьләр түгәрәк уенда күңел ачканнар, танышканнар, көзгә кавышканнар.
Бәйрәмдә Питрау җырулары һәм биюләре белән беррәттән, кунаклар өчен махсус фотозона эшләде, Питрау сыйлары-үләнле чәйләрдән, тәм томнардан авыз итү урыны да каралган, Түгәрәк уеннар оештырылды. Мамадыш районының Җөри авылында узган ”Питрау” республикакүләм керәшен мәдәнияте бәйрәмендә “Керәшен чибәре-24” титулын алган чибәр кыз белән аралашу да мөмкин булды.
Бәйрәмдә керәшеннәрнең «Бәрмәнчек» дәүләт фольклор ансамбле солистлары, Яков Емельянов исемендәге мәдәни үзәкнең “Казансу” халык фольклор ансабле һәм яшь җырчылар чыгышлары күңелләрдә җылы хисләр калдырды.
Фәннур Хәсәнов, Дамир Мөхәммәтханов Татарстан яңалыклары.
