Татарстанның социаль учреждение хезмәткәрләре махсус өстәмә акча алачак. Хәзер аларның күбесе, үз изоляция режимына күчерелде. Безнең иҗат төркеме Арча районынын картлар һәм инвалидлар интернат — йортында булып, пандемия шартларында социаль хезмәткәрләрнең ничек эшләүләре белән кызыксынды.
Язгы кояшта йөрү сәламәтлеккә файдалы, — ди Николай Семенов. Үзеңне яхшырак тоясың, йокы да тәмлерәк була. Өлкәннәрне социаль хезмәткәрләр карый — кулларыннан тотып, күчеп йөрергә булышалар. Ә пандемия чорында яннарыннан бер адым да читкә китмиләр.
Николай Семенов (пенсионер): » минем кан басымы югары. Персонал бер атнадан артык контрольдә тота. Көн саен иртән укол алам. Тотрыклы рәвештә тикшерәләр, контрольдә тоталар.»
Хәзер Арчадагы өлкәннәр интернат-йортында 57 кеше яши. Аларны 14 хезмәткәр — медиклар, социаль хезмәткәрләр, психологлар карый. Барысы да битлек режимын катгый үти, бинаны даими дезинфекциялиләр. Үз изоляция режимы вакытында хезмәткәрләр учреждениедән китмиләр диярлек. Сменалап икешәр атна эшлиләр. Көндез дә, төнлә дә эш җитәрлек.
Ашханә хезмәткәрләре дә армый-талмый эшли. Ике кеше гадәти һәм диетик меню әзерләргә өлгерә. Биредә яшәүчеләр көнгә дүрт тапкыр туклана.
Хәзер республикада 44 социаль учреждение карантинга ябылган. Аларда меңнән артык кеше эшли.
ТР Хезмәт, мәшгульлек һәм социаль яклау министры Эльмира Зарипова: «ТР Президенты Рөстәм Миңнеханов та бу мәсьәләгә зур игътибар бирә. Аның .район башлыкларына мондый учреждениеләрдә эшләүчеләргә ярдәм итү буенча йөкләмәсе бар. Аерым алганда, бу — контактсыз туклану, торак-коммуналь хезмәтләр күрсәтү, мәсәлән, каты көнкүреш калдыкларын чыгару.»
Исегезгә төшерәбез, социаль учреждениеләрдә эшләүче табиблар өчен өстәмә 40 мең сум түләнәчәк. Социаль, педагогик хезмәткәрләр, урта медицина персоналы өчен ул -25 мең сумга кадәр, кече хезмәткәрләр өчен– 15 мең сумга кадәр, техник персонал өчен-10 мең сумга кадәр булачак.
Ралина Абрамова, Ирек Хәмидуллин.
