Чыгарылышыбызны кайгылы хәбәр белән башлыйбыз. Каты авырудан соң, Татарстанның халык артисты Рафаэль Ильясов 81 яшендә вафат булды. Бүген , шушы минутлрда мәрхүмне соңгы юлга озатучы туганнарының, якыннарының тирән кайгысын уртаклашабыз. Рафаэль Зариф улы Ильясов безнең телерадиокомпаниянең хезмәт ветераны иде. Киләсе язмабыз Рафаэль ага Ильясов истәлегенә багышлана.
Әле күптән түгел генә арабызда булган Рафаэль ага турында үткән заманда сөйләве дә авыр. Радиотыңлаучыларыбыз аның Музыкаль Татарстан, Таныш моңнар, «Осталык һәм остазлык» дип аталган тапшыруларын бик яратып тыңлый, кат-кат шалтыратып рәхмәт әйтә иде. Әлеге видеоязма узган ел радио көнендә төшерелгән. Рафаэль абыйны 80 яшьлек юбилее белән котлыйбыз.
Фирдүс Салихов “Татарстан” дәүләт телерадиокомпаниясе директоры
Руслан Дәминов Татарстанның атказанган артисты
Радионың алтын фондын туплауда, милли музыкаль әсәрләрне яздыруда гаҗәеп зур хезмәт куйган Рафаэль ага бу хакта ул үзе болай дип искәртеп калдырган .
Татарстанның халык артисты, Татарстанның атказанган сәнгать эшлеклесе Рафаэль Ильясов Чүпрәле районының Түбән Чәке авылында туган. Әнисеннән бик яшьли ятим кала. Әтисе аны сәгать юлына кертеп җибәрә. Заһид Хәбибуллин, Рөстәм Яхин , Сара Садыйкова , Нәҗип Җиһанов кебек татар халкының мәхшүр затлары белән аралашып хезмәттәшлек итәчәген ул чакта музыка училищесында укый башлаган авыл малае белми әле. Җырларга да ашыкмый. Бик сирәк уен коралы — габойда уйнарга өйрәнгәч, бары тик консерватория студенты булгач, Рафаэль Ильясов исем-фамилиясе афишаларда күренә башлый.
“Камәр”, “Олы юлның тузаны”, “Галиябану”, “Рәйхан”, “Сандугач” җырлары Рафаэль Ильясов башкаруында халык күңеленә кереп калган моң җәүһәрләре. Габдулла Тукай исемендәге Дәүләт премиясенә дә ул нәкъ менә халык җырларын башкарганы өчен лаек булды.
Интернетсыз заманнарда Чит илдә яшәүче татарлар Рафаэль Ильясов җырлары язылган аудиодискларны иң зур бүләк итеп кабул итә.
“Рафаэль җырлаганда минем йөрәгем татарча тибә башлый”, — дип зурлаган иде җырчыны заманында Марсель Сәлимҗанов. Аны шулай бик бик пөхтә кеше дип тә искә ала замандашлары. Хәтта, концертларда үтүкләнгән чалбары бөкләнмәсен дип, утырмый, сәхнә артында йөреп тора иде. Чөнки аның халык алдына чыгасы бар. Аның моңында да пөхтәлек бар. Борынгы җырларны пөхтә, бормалы итеп, сузып, профессиональлек белән башкара ул, -дип сөйләгән иде җырчының туган ягында үткән юбилей кичәсендә Рабит Батулла. Якташлары өчен дә Рафаэль абый туганнары кебек якын кеше булды. Кайткан саен «Чүпрәле” җырын җырламый калмый иде.
Бер җыентыгын җырларымда моңнарым дип атаган Рафаэль Ильясов. Әйе ул моңлы чор кешесе иде. Ә чор китеп бара.
Мөршидә Җиһан, Таһир Хәсәнов. Татарстан яңалыклары.
