Татарстанда якын арада планлаштырылган барлык зур спорт һәм мәдәни чаралар кичектерелә. Бу хакта Министрлар Кабинетында Татарстан Президентының матбугат хезмәте җитәкчесе Лилия Галимова белдерде. Карар коронавирус үтеп керүне булдырмау буенча Россия штабы белән берлектә республика штабы тарафыннан кабул ителгән. Концертлар, ярышлар, форумнарны оештыручылар белән аларны үткәрү даталарын үзгәртү турында индивидуаль сөйләшүләр алып барыла. Танылган пианист Денис Мацуевның чыгышлары башка вакытка күчерелгән инде.
Шулай ук Рөстәм Миңнеханов карары буенча хакимият органнары вәкилләренең чит илләргә командировкалары туктатып торыла, Президентның үз графигы да үзгәртелде. Якын арада чит илгә барырга ниятләгән кешеләр өчен дә аерым тәкъдимнәр бар. Бигрәк тә коронавирус теркәлгән илләргә бару аерым контрольдә.
8 (843) 296 02 24
Татарстанда коронавирус буенча «кайнар линия» дә эшли. Ул авыру очраклары теркәлгән территориядән кайтучылар өчен. Иллеләп шалтырату булган инде.
