Татарстанда үстерелгән яшел салат үсемлекләре, җир җиләге сатуга чыгарыла. Чикләүләрне йомшартканнан соң, авыл хуҗалыгы җитештерүчеләре эшчәнлекләрен берничә тапкырга арттырган. Яшел Үзән районында, мәсәлән, тәүлегенә тоннадан артык уңыш җыялар. Фермер хуҗалыгында пандемия шартларында эшсез калган җирле авыл халкына да вакытлыча эш табылган.
Әле берничә ел элек кенә, биредә Мари-Эл белән чиктәш җирдә, Яшел Үзән районында җирләр буш торган, өстәвенә, чүп үләннәре басып киткән. Буш торган җирне инвестор сатып алгач, җанлану башлана. Җирне сөрәләр, әүвәл җир җиләге, соңрак яшел салатлар үстерә башлыйлар. Теплицалар төзеп, елына 60 тоннага кадәр уңыш җыялар.
Лолоросса, коралл салат үсемлекләр орлыклары Италиядән кайтарылган. Безнең туфракка да яраклашканнар. 40тан алып, 45 көнгә кадәр үстерелә, бер куак бер килограмм уңыш бирә.
Сату бүлеге җитәкчесе Әсхәт Гыйниятов: «Менә шулкадәр яшеллек хәтта зур гаиләне ике тапкыр тукландырырга җитә, ул тыгыз, витаминнарга бай.»
Дөньяда иң популяр Романо салаты да Татарстан җиренә яраклашкан. Аш-су осталары аның яфракларыннан һәркем яраткан цезарь салатын ясыйлар. Җирле агрономнар әйтүенчә, җәй башы көйсез булса да, үсемлекләр яхшы үсә.
Салатларны җыюны иртәдән башлыйлар, кич белән төгәллиләр. Авыл халкы көне буе кырда. Вирус таралу сәбәпле эшсез калучылар эшли. Тәүлегенә бер тонна салат җыялар. Тиздән җиләк җыюга керешәчәкләр. Июль аенда гектардан 25 тонна уңыш алырга исәпләре.
Крестьян-фермер хуҗалыгы директоры Илдар Сидиков: «Безнең продуктлар нәрсәләре белән тәмле дисезме? Бездә уникаль урыннар, яхшы туфрак, җыелган кар сулары. Болар сыйфатка уңай йогынты ясый.»
Фермерлар Татарстан базарына чыга, сәүдә челтәрләре белән сөйләшүләр алып барыла. Җиләк-җимеш һәм салатлар сыйфатлары буенча чит илнекеләрдән калышмаячак, дип ышандыралар.
Алмаз Хәкимов, Сергей Павлухин.
