Иң мөһиме-игътибар. Татарстанда «Сиделка» республика пилот проектын сынап карыйлар. Әлеге проект буенча эшкә сәләтсез кешеләрне карап-тәрбияләп тору каралган. Ул федераль бюджеттан финанслана. Чаллыда проектның ничек үтәлүе белән без дә кызыксындык.
Гүзәл Нургалиева күп еллардан бирле авыру кешеләрне тәрбияләргә булыша. Валентина Дмитриевнаны бер елга якын карый. Авыруны диета буенча тукландыру, киендерү, эчке гигиена әйберләрен алыштыру аның төп вазыйфаларына керә. Халык телендә сиделка дип йөртелгән өй тәрбиячесе көн саен 6 сәгатькә килә, бу вакытта Валентина Дмитриевна белән шактый гына аралаша да.
Өй тәрбиячесе Гүзәл Нургалиева: «Барысын да күңел белән эшләргә кирәк. Күңелең белән эшләмәсәң, берни дә барып чыкмый. Кеше миңа туганым кебек караса, мин дә шат. Аның өч кызы да мине яхшы кабул иттеләр, барысы да әйбәт.»
Авыруның кызы Лилия Сәлимгәрәева: «Бу безнең гаилә өчен зур ярдәм, безгә эшебезне ташламаска, гадәти тормыш ритмын дәвам итәргә мөмкинлек бирде.»
Чаллыдагы һәм Татарстанның тагын 20 районында мохтаҗ гаиләләргә мондый ярдәмне 2019 елдан бирле «Содействие» социаль ярдәм үзәге күрсәтә. Ул «Демография» илкүләм проектының «Сиделка» пилот проекты буенча эшли. Быел Чаллыда 60 авыру кешегә шундый ярдәм күрсәтелә. Шәһәрдә 50гә якын өй тәрбиячесе эшли.
«Содействие» социаль ярдәм үзәге директоры Полина Петрова: “Сиделка” проектына эләгү өчен, Чаллы шәһәренең социаль яклау идарәсенә мөрәҗәгать итәргә һәм гариза язарга кирәк. Ярдәм күрсәтелергә тиешле кешенең авыру икәнлеген махсус комиссия таный.»
“Содействие” Үзәге телефоны 78-28-35
Күп очракта пенсионерлар ярдәмгә мохтаҗ. Ә гомумән 18 яшьтән өлкәнрәк булган, эшкә сәләтен югалткан һәр авыру кеше әлеге хезмәтләрдән файдаланырга мөмкин. Ике яшәү минимумыннан кимрәк керемле гражданнарга хезмәтләр бушлай күрсәтелә. Проектны 2022 елга кадәр сынап карыйлар.
