Татарстанда әлегә ковид чикләүләрен гамәлдән чыгарырга җыенмыйлар. Бу хакта Instagram да турыдан-туры эфир барышында республика вице-премьеры, ковидка каршы көрәш буенча республика штабы җитәкчесе Ләйлә Фазлыева хәбәр итте. Турыдан-туры эфир барышында антитәнчекләр буенча куар кодларны кайчан бирә башлыйлар, укучылар дистанцион укуга китәрме, дигән сораулар да бирделәр. Тулырак мәгълүмат киләсе сюжетта.
Бер көндә пандемия башланганнан бирле яңа рекорд — мең ярымнан артык авыру теркәлгән. 444 кеше хастаханәгә салынган. Турыдан – туры эфир барышында билгеләп үтелгәнчә, медицина хезмәткәрләре авырлы хатын-кызларны, хроник авырулы өлкәннәрне үз контрольләренә алган. Вакцинация темплары яхшы, әмма чикләүләр бетерү турында сөйләргә иртәрәк. Шуңа күрә битлекләр, антисептиклар һәм код куарны тикшерү гамәлдән чыгарылмый.
Чикләүләр бетерелгәч тә, үзеңнең, якыннарыңның сәламәтлегенә игътибарлы булырга кирәк. Гадәттә яз көнне кискен вирус авырулары көчәйгән вакытта, битлек режимы саклана.Февральдә дә бу авырулар чигенми әле. Шуңа күрә чикләүләр бетерелә калса да, битлек режимы сакланырга тиеш.
Республикада грипп, кискен вирус авырулары сәбәпле, Актаныш, Минзәлә һәм Тукай районнарында өч мәктәп тулысынча ябылган. Һәр мәктәптә укучылар көн саен иртәнге тикшерү уза. Сыйныфларда авыручылар 20% тан артык булса, дистанцион укуга күчәләр. Шимбә көнне мәктәпләрдә саф һавада чаралар үткәрергә тәкъдим ителде. Шулай ук 6 февральдән үз көченә кергән яңа чаралар турында да фикер алыштылар-коронавирус белән авыручыларның больничный кәгазьләрен кабат тест ясамыйча ябалар. Хәзер поликлиникалардагы киеренкелекне исәпкә алып, авыруның беренче билгеләре буенча 122 кайнар линия телефонына яки дистанцион консультациягә, больничныйны рәсмиләштерү өчен яшәү урыны буенча поликлиникага мөрәҗәгать итәргә мөмкин. Роспотребнадзор белгечләре шулай да лаборатор тикшеренүләрне медицина учреждениеләрендә узарга киңәш итә.
