Татарстанда коронавирус таралуга бәйле рәвештә түләүсез юридик ярдәм күрсәтү буенча кайнар линия эшли. Карантин вакытында кредитны ничек түләргә? Турга юллама өчен акчаны ничек итеп кире кайтарырга яки больничный кәгазен алырга? Бу сорауларга җавап алу хәзер җиңеләйде. Белгечләрнең эшен хәбәрчебез дә күзәтте.
Кайнар линия телефоны эшли башлауга әле ике генә көн узса да, шалтыратулар өзелеп тормый. Коронавирус таралу куркынычы яшәешкә шактый үзгәрешләр кертте, кешеләрнең сораулары да күп җыела. Соңгы көннәрдә юристларга мөрәҗәгать итүләр саны берничә тапкырга арткан.
«Россия юристлары Ассоциациясе» Татарстан бүлеге башкарма комитеты рәисе ярдәмчесе Лилия Яфизова: « эпидемиологик хәл аркасында чит ил юлламаларын рәсмиләштерү, бездә күп кенә рейсларны гамәлдән чыгару кебек сораулар белән еш мөрәҗәгать итәләр. Шулай ук больничный кәгазьләрен теркәмичә генә, административ ялга китүгә кагылышлы мәсьәлә дә актуаль.»
Кредитлар түләүгә бәйле сораулар да күп, кешеләрне ипотека каникуллары да кызыксындыра. Бер-ике сәгать эчендә кая мөрәҗәгать итәргә икәнлегенә җавап та бирәләр. Коронавирус диагнозы һәм вирустан үзеңне ничек саклап калу турындагы сораулар гына җавапсыз кала. Әлеге сораулар белән табибларга гына мөрәҗәгать итәргә кирәк.
«Россия юристлары Ассоциациясе» Татарстан бүлеге референты Алинә Галимова: «безгә вирустан ничек сакланырга дигән сорауларны да бирәләр Без бары тик юридик сорауларга гына җаваплар әзерлибез, моның өчен тиешле белгечләр белән элемтәгә керәбез, аларның җавапларын алабыз.»
8-960-080-90-50
Телефон республика халкы өчен билгеләнгән. Кайнар линия эш көннәрендә сәгать иртәнге тугыздан киче алтыга кадәр эшли. Телефон номеры экранда күрсәтелгән. (Телефон номеры: 8-960-080-90-50 сайт өчен)
Гүзәл Зәйнакова, Владимир Юрков.
