Татарстанда илле километр озынлыгында төбәк юлларын, өч юлүткәргеч һәм җиде күпер төзергә планлаштыралар. Капиталь ремонт сезоны да башланды. Барлыгы дүрт күпер һәм ике йөз кырык километрга якын юл төзекләндереләчәк. Республика трассаларында масштаблы ремонт эшләре кайчан башлана?
Татарстанда юлларны төзекләндерү эшләре тәүлек әйләнәсе бара. Казанның Гвардиячеләр һәм Зорге урамнары участокларында йөзгә якын кеше эшли. Яңгырлы вакытта иске асфальтны кисеп җыялар, аяз көндә яңасын җәяләр.
«Алексеевскдорстрой» ААҖ төзелеш участогы башлыгы Дамир Гусейнов: «төнге сменада әзерлек эшләре башкарыла, ә тәүлекнең көндезге вакытында бетон җәелә, асфальт-бетоннын өске катламнарын кисеп җыю эшләре башкарыла.»
Юл техникасы шулай ук Болотников, Тэц, Патрис Лумумб урамнарында, Җиңү Проспектында да кулланыла.
Казанда барлыгы кырык километр юл ремонтланачак. Ә республикада — ике йөз кырык километрга якын. Моның өчен «Куркынычсыз һәм сыйфатлы автомобиль юллары» илкүләм проекты буенча биш миллиард сумнан артык акча бүлеп бирелгән. Федераль трассаларны да тәртипкә китерүне дәвам итәчәкләр.
ТР Транспорт һәм юл хуҗалыгы министры Ленар Сафин:«Быел М-7 трассасын 735, 771 километр участокларында реконструкцияләүне дәвам итәчәкбез.Чулман елгасы аша Соколка торак пунктына кадәр күпер аша Түбән Кама һәм Чаллы шәһәрләрен чыгу юлы белән урап узу участогын проектлаштыру дәвам итә.»
Тулаем алганда, йөз илле километрдан артык федераль юл төзекләндереләчәк.
Инна Данилова, Фәнис Мөхәммәтов, Ленар Хәбибуллин.
