Татарстанда икмәкнең социаль сортларын пешерүче предприятиеләр өчен субсидияләрне илле процентка арттырачаклар. Хәзер ул сатылган продукциянең килограммына 4 сум 50 тиен туры килә. Димәк, әлеге төр икмәк-күмәчне элеккеге бәяләрдән сатып алырга мөмкин булачак. Ә икмәк пешерү өчен чыгымнар гел артып тора. Камырны мичкә урнаштыргач, икмәк югары температурада тиешле формага кереп пешә. Икмәк пешеп чыккач, технологик чылбырның киләсе звеносы – аның өстенә пар җибәрәләр.
Казанның күмәч-кондитер комбинатында 7 җитештерү линиясе эшли. Куәте берничә дистә төр икмәк пешерергә мөмкинлек бирә.
Татарстанда социаль ипигә бәяләрне берничә ел арттырмаганнар. Җитештерү чыгымнары артса да. Шуңа күрә комбинатлар субсидия ала. Элек ул сатылган икмәкнең килограммына 3 сум булса, хәзер 4 сум 50 тиен тәшкил итә.
Күмәч-кондитер комбинаты генераль директоры Булат Котдусов: «Субсидия бирелмәсә, ипи бәяләре нык артыр иде. Безнең һәр сум ярым сатып алучыланың 10 сум акчасын янга калдыра.»
Җитештерүчеләр өчен дә, кулланучылар өчен дә отышлы математика барлыкка килә. Икмәк пешерүчеләргә адреслы ярдәм 2020 елның икенче кварталыннан башланачак.
Татарстан Республикасы Авыл хуҗалыгы һәм азык-төлек министрының беренче урынбасары Наил Залаков: «саннар зур түгел, әмма предприятиеләрнең җитештерү күләмнәрен исәпкә алсак, бу сизелерлек ярдәм.»
Быел субсидиягә барлыгы 160 миллион сум акча бүлеп биреләчәк. Моннан тыш, республика Хөкүмәтенең финанслау күләмен арттыру планы да бар. Икмәк бәяләре тотрыклы сакланырга тиеш.
Вадим Струминский, Ания Гыйбадуллина, Дамир Мөхәммәтханов.
