Республиканың социаль учреждениеләрендә янгын куркынычсызлыгы буенча прокурор тикшерүләре нәтиҗәләрен хәбәр иттеләр. Тикшерүләр Башкортстанда булган фаҗигадән соң башланды. Анда берничә атна элек шәхси пансионатта янгын чыгып, 11 кешенең гомере өзелгән иде. Татарстанда җиде шәхси өлкәннәр йортында 100 дән артык хокук бозу очрагы теркәлгән. Хәзерге вакытта торак секторда куркынычсызлыкка аерым игътибар бирелә. Статистика күрсәткәнчә, нәкъ менә кышкы чорда янгыннар ешрак була. Бигрәк тә Яңа ел каникулларында. Шуңа күрә коткаручылар көчәйтелгән эш режимына күчте. Ведомство бәйрәм чаралары уза торган мең ярымга якын объектны, чыршы шәһәрчекләрен контрольдә тота. 10 гыйнварга кадәр республика территориясендә янгынга каршы махсус режим гамәлдә булачак.
Рәфис Хәбибуллин Россия Гадәттән тыш хәлләр министрлыгының Татарстандагы идарәсе җитәкчесе
