Татарстанда битлек куллану режимы киләсе елның март ахырына кадәр сакланачак. Бу хакта Роспотребнадзор оешмасыннан хәбәр иттеләр. Ә Чит илләрдән килгән кешеләрне ныклы контрольдә тоталар. Анталиядән кайткан туристларны да Казан Халыкара аэропортында эпидемиологлар белән безнең хәбәрчебез дә каршылады.
Әлеге рейс әле генә Анталиядән килеп төште. Бу соңгы 5 айда Габдулла Тукай исемендәге Казан аэропортына төшкән алтынчы халыкара рейс. Ә самолет бортында 227 кеше.
Шуларның бишесе — Әхмәтовлар гаиләсе. Кояшлы Төркиягә юлламаны чикләр ачылуга ук сатып алганнар. Ә туган якка кайткач, гаиләне башка чикләүләр белән каршы алдылар. Чик буе контроле зонасыннан чыгуга, ак халатлы табиблар көтә иде. Шунда ук ковид 19га тест узарга тәкьдим иттеләр. Бәясе 1270 сум.
Гигиена һәм эпидемиология үзәге җитәкчесе урынбасары Лидия Ставропольская: «Түләүле хезмәт күрсәтү сәбәпле, алар физик зат белән килешү төзиләр, аннан соң кассага баралар, турыдан-туры материал алына.»
Процедураны өлкәннәр дә, балалар да узарга мөмкин. Анализ нәтиҗәләрен Сеченов урамындагы лабораториядә бирәләр, яки электрон почта аша җибәрәләр. Теләсә нинди очракта, коронавируска тест өч тәүлек дәвамында мәҗбүри ясала. Роспотребнадзор чит илдән самолетта кайтучыларга карата катгый таләпләр куйды.
Роспотребнадзорның ТР буенча Идарәсе территорияне санитар саклау бүлеге җитәкчесе Луиза Борисова: «Россиягә кайтучылар анкета тутырырга тиеш. Билет алгач, теркәлү узганчы ук анкета булырга тиеш. Боларның барысы да дәүләт хезмәтләре порталында эшләнә.»
Тект нәтиҗәләрен дә порталга урнаштырырга , сәламәтлек турында алдан кайгыртырга кирәк. Әгәр ике атна дәвамында кешенең хәле начарайса, кичекмәстән табибка мөрәҗәгать итү, чит илдән кайту турында хәбәр итү мәҗбүри. Кагыйдәләрне бозганда 15 меңнән алып 40 меңсум га кадәр штраф салына.
Булат Шакиев, Фәнис Мөхәммәтов, Владимир Юрков. Татарстан яңалыклары.
