Татарстанда «Безнең ишегалды» программасы буенча ремонт эшләре дәвам итә. Ул республика Президенты Рөстәм Миңнеханов инициативасы белән башланды. Проектлар йортларда яшәүчеләрнең теләкләрен исәпкә алып, онлайн режимында килештерелде. Масштаблы төзекләндерү эшләре республиканың өч йөздән артык ишегалдында бара.
Себер трактындагы йортлар ишегалдында яшәүчеләр әлеге төзелешне түземсезлек белән көткән.
Ишегалдын төзекләндерү планы әлегә схемада гына. Халыкның һәр теләген исәпкә алып, план төзелгән. Беренче чиратта асфальтланган юл һәм балалар мәйданчыгы кирәк.
Татарстан президентының «Безнең ишегалды» программасы буенча эшләр барлык районнарда да башланды.
» Казанда масштаблы төзекләндерү эшләренә бер үк вакытта иллеләп ишегалдында керештеләр. Юлларны асфальтлау, балалар мәйданчыкларын булдыру — күп кенә ишегалларында төзекләндерү берничә йорт янында берьюлы алып барыла. Әйтик, биредә 4 ишегалды төзекләндерелә.»
Яңа парковка урыннары, яңартылган тротуарлар, яктырткычлар, эскәмияләр, урналар — программа ишегалларын уңайлы, заманча һәм куркынычсыз итәргә мөмкинлек бирәчәк.
«Татарстан шәһәрләрен үстерү институты» фонды департаменты җитәкчесе Венера Камалова: «эш башланырга өч көн кала объект паспорты урнаштырыла. Ул үз эченә барлык проектларны алган. Бу урыннардан алыначак агачларга кайнар линия телефоннары урнаштырыла.»
Бирегә шалтыратып, төзекләндерүнең барышы турында мәгълүмат алырга, сыйфатсыз эшкә шикаять белдерергә мөмкин. Һәрберсе исәпкә алыначак.
Айнур Вәлиәхмәтов, Ленар Хәбибуллин.
