Татарстан ил үсешенә, бигрәк тә төзелеш тармагына зур өлеш кертә. Бу хакта бүген стратегик инициативалар агентлыгының күзәтү советы утырышында Владимир Путин белдерде. Президент билгеләп үткәнчә, Татарстан белгечләре узган елда торак төзелешендә югары нәтиҗәләргә ирешкән.
Владимир Путин моның өчен Рөстәм Миңнехановка рәхмәт белдерде, Республика Рәисе утырышта видеоэлемтә аша катнашты. Ул Татарстанның уңышлы тәҗрибәсе Россиянең 14 төбәгендә гамәлгә ашырылуын хәбәр итте. Аерым алганда, сәламәтлек саклау өлкәсендә «Связь» — йөкле хатын-кызларның сәламәтлеген дистанцион мониторинглау сервисы үрнәк итеп алынды.
Татарстан тәҗрибәсе Ингушетиядә һәм Ненец автономияле округында гамәлгә кертелде. Шулай ук Рөстәм Миңнеханов хәбәр иткәнчә, быел Казанда ачылырга тиешле яңа перинаталь үзәк тә яңа туган сабыйларның сәламәтлеген саклау өчен мөһим проект. Владимир Путин Рөстәм Миңнехановка Республикадагы яхшы күрсәткечләр өчен рәхмәт белдерде.
