Өченче Халыкара «Татар сүзе» нәфис сүз телевизион бәйгесенең җиңүчеләре билгеле. Тулырак Ләлә Зәйнуллина репортажында.
Быелгы “Татар сүзе” бәйгесе гала концерты әнә шулай Роберт Миңнуллинның “Туган телемә” шигыре белән башланып китте. Өченче Халыкара нәфис сүз телевизион бәйгесенең җиңүчеләре билгеле. Быел конкурсны Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «Яңа Гасыр» телерадиокомпаниясе оештыра.
Телебез язмышына кагылышлы гамәли бәйгеләр күп. Бу бәйге — иң дәрәҗәлеләрнең берсе. Туган телебезнең нинди аһәңле икәненә, бай мирасыбызга инандыра ул.Конкурска 3 меңнән артык гариза бөтен Россиядән һәм чит илләрдән кабул ителә.
Татар әдәби әсәрләрен сәнгатьле сөйләүчеләр комиссия хөкеменә шигърият, проза жанрлары буенча үзләренең бәйге эшләрен тәкъдим итә. Шуларның утызы җиңүче исеменә лаек.Тәмәннән килгән Екатерина Әхмәтҗанова бәйгегә борынгы Себер риваятьләренә нигезләнеп язган үз хикәясен җибәрә.
Жюри тарафыннан иң популяр номинацияләр булып, шигърият һәм иҗади гаилә номинацияләре ачыклана. Катнашучылар арасында үзешчәннәр, профессионаллар, үз әсәрен сөйләүчеләр, иҗади гаиләләр дә катнашты.
Өч бала әтисе Рүзил Ихсанов җиңүчеләр исемлегендә. Гала концертта Муса Җәлилнең “Бер үгет” шигыре белән катнаша.Бәйгегә июль аенда старт бирелә. Җиңүчеләрне сайлап алу җиңел булмый.
Быелдан башлап бәйгенең үз гимны барлыкка килде. Чара быел беренче тапкыр телевизион проект буларак тормышка ашырыла.
Ләлә Зәйнуллина. Илдар Гәләветдинов, Татарстан яңалыклары.
