Хәерле көн, мөхтәрәм телевизор караучылар! Татар матбугатындагы күзгә-башка ташланган язмаларны укуны дәвам итәбез.
“Балалар авырый. Кытай гаепле түгел…” Шәhри Казан” газетасының беренче битенә чыгарып бирелгән язма шулай дип атала. Кышка кергәндә вируслы инфекция hәм грип йоктыру гадәти күренеш саналса да, быелгы ул чирләргә микоплазмалы пневмония дигәне дә өстәлгән икән. Соңгысы атналар буена сузыла торган алҗыткыч йөткерүне аңлата. Әлеге инфекция башлыча балалар hәм үсмерләр арасында еш таралучан. Авыручылар күп булу сәбәпле кайбер мәктәпләрдә кышкы каникул алдыннан карантин игълан ителгән. Белгечләр раславынча, бу чирнең баш калкытуында Кытайның гаебе юк икән- микоплазмалы пневмониянең 5-10 елга бер шулай баш калкытып ала торган гадәте бар ди. Ковид дигән зәхмәтне кичергәннән соң, ахыры хәерле булсын дип кенә теләргә кала.
Үткән атнада булып узган Татарстан муниципаль берәмлекләр советының съездында иң еш телгә алынган проблемалар- авыл халкының үзәгенә үткән юл белән су. Бу хактагы язманы “Шәhри Казан» газетасының икенче битеннән укып була.
“Ватаным Татарстан” газетасы үткән атнаның пәнҗешәмбесендә ачылган иң тиз йөрешле, иң заманча М-12 дип аталучы автомобиль юлының ачылуы уңаеннан тәфсилле язма бастырган. Инде хәбәр иткәнебезчә, 810 чакрымлы бу юл Мәскәү белән Казан арасында йөрү вакытын ике тапкырга киметеп, ил тарихындагы иң зур вакыйгаларның берсенә әверелде. Дөньяда бик күпне күрергә өлгергән Татарстан Рәисе Рөстәм Миңнеханов та гаҗәпләнүен белдереп, болай дигән:”Минем мондый юлны күргәнем юк иде әле”.
Моңа өстәп-Алга таба да күрмәгәннәребезне күреп, сөенеп, рәхәтләнеп яшәргә язсын иде дип кенә телисе кала.
Балалар өчен яңа җырлар ник юк? Булып та, ни өчен алар популяр түгел? Репертуар сайлаганда, балалар, педагоглар hәм ата-аналар нәрсәгә игътибар итә? “Ватаным Татарстан” газетасы хәбәрчесе шушы сорауларга җавап табарга тырышкан. Чыннан да, 10-14 яшьлек балаларның җавапсыз мәхәббәт турында җырлавын сәхнәдән тыңлавы сәер генә түгел, куркыныч та.
“Сөембикә” журналы көнүзәк тема итеп куркыныч уенчыклар турындагы проблеманы күрәргән.Балалар бүген йомшак аюларга да, “Маша”, “Миләүшә” исемле курчакларга да, трактор-машинарга да кызыкмый. Уенчык модасы башка- компьютер уеннарына, мультфильм геройларына мөкиббән бүгенге балалар. Ыржаеп торган Хагги-Ваггилар балага нинди киләчәк әзерли? Балаларының, оныкларының язмышына битараф булмаганнар бу язманы укып чыкса, бер дә артык булмас иде. Соңыннан үкенмәс өчен. Әлеге язманың дәвамы буларак кабул ителә торган “Бала күңеле далада” исемле язма да бала тәрбияләүче әти-әниләрне битараф калдырмас дип уйларга кирәк.
Гомумән, “Сөембикә” журналының декабрь саны йотлыгып укый торган язмаларга бай килеп чыккан. Затлы журнал үзенең укучыларын ретро стилендәге Яңа ел открыткасы белән дә куандырырга булган. Сезне дә якынлашып килүче Яңа ел белән котлап, киләсе елда да укудан hәм фикер йөртүдән аерылмасак иде дигән теләктә бүгенгә сезнең белән саубуллашам. Исәнлектә күрешик!
