Хәерле көн, мөхтәрәм телевизор караучылар. Татар матбугатын күзәтүне дәвам итәбез.
“Шәхри Казан” газетасының беренче битендә басылып чыккан “Үләрмен дип тә уйлаган идем, яшим әле…” дигән язманы укыганнан соң, Аллаh биргән гомерне махсус озайтып та, кыскартып та булмый дигән нәтиҗәгә киләсең. 100 яшен тутырган Таhирә әбинең сүзләренә караганда, ачлы-туклы тормыш та, кайгы-хәсрәт тә ул дәрәҗәдә тәэсир итми икән гомер озынлыгына. Бары тик үзеңне башкалар өчен кирәкле санау гына озайта ди адәм баласының гомерен. Бу сүзләргә колак салмый да ярамый- кирәкле кеше булып яшәргә насыйп булсын!
Газетадагы беренче карашка сәер кебек тоелган икенче бер язма Апаста туып үскән хоккейчы кыз Камилә Сафина турында. Бөтен авырлыкларны да җиңеп, кыз барыбер үз дигәненә ирешкән-Россиядәге иң көчле хатын-кызлар хоккей командасының хөҗүчесе булган. Җаны теләгән- елан ите ашаган дип шундый очракларда әйтә безнең халык.
Соңгы вакытта торган саен ныграк таныла баручы талантлы җырчыбыз Марина Карпованың язмышы да гыйбрәтле. Бәлки нәкъ менә шундый тормыш юлы үткәнгә күрә дә үз итәдер аны җыр-моң яратучы безнең тамашачы.
Машинадан төшеп, җәяү йөрергә туры килмәгәе. Бензин бәясе артуга аптыраган тимер ат хуҗалары әнә шулай ди. Бүген АИ -92 маркалы бензинның бер литры 50 сум чамасы тора. Алга таба ничек булыр? Ягулыкның сыйфаты ни хәлдә? Әлеге сорауларны “Ватаным Татарстан” газетасы хәбәрчесе белгечләргә биргән. Атым юк буранда дип кенә котыла торган түгел шул бензин бәясе- ул безнең атсызларның да кесәсенә сугасы көн кебек ачык. Ил белән бергә күрәсе дип тынычландырсак кына инде үз-үзебезне.
Соңгы вакытта халык мәнфәгатьләрен кайгыртып әйтелгән сүзләрне дә ишетә башладык. Шундыйларның берсе- ни өчен халыктан түбән бәягә алынган сөтне кибетләрдә кыйммәт бәядән саталар? дигән җавапсыз да аңлашыла торган сорауга тәфсилле җавапны шул ук “Ватаным Татарстан” газетасыннан укып була. Халыкны, сыер асрамыйча, коры сөттән әтмәлләнгән сыекча эчәргә күндереп бетергәннән соң, ай-хай, тагын мал-туар янына якын китереп булыр микән ул.Анысын киләчәк күрсәтер.
Шундый күңелне китә торган хәбәрләргә дә карамастан, иртәгәсе көнебезнең хәерлерәк буласына ышаныч белән яшисе иде дигән теләктә бүгенгә сезнең белән саубуллашам. Исәнлектә күрешик!
