Казан кооператив институтында Ифтар ашы узды. Мәҗлескә татар зыялылары, телевидение ветераннары, Әлки районы “Якташлык” җәмгыяте үсешенә өлеш керткән дин, сәнгать, мәдәният әһелләре, хезмәт ветераннары чакырылган иде.
Россия кооперация университеты ректоры, «Мәрхәмәт-Милосердие» Татарстан Дәүләт Советы хатын-кыз депутатлары оешмасы рәисе Алсу Нәбиева һәркемне сәламләп, мәҗлесне ачып җибәрде. Рөстәм хәзрәт Вәлиуллин вәгазьләр сөйләде. Коръән сүрәләрен яңгыратты. Мәчлестә Әлки, Арча районы имамнары катнаштылар. Татарстан мәгариф һәм фән министры урынбасары Минзәлия Закирова, Бөтендөнья татар конгрессы Башкарма директоры Данис Шакиров, Казанның Абдулла Алиш исемендәге гимназия директоры Рәхимә Арсланова, абруйлы шәхесләребез- Татарстан Фәннәр академиясе академигы Индус Таһиров, танылган галим-галимәләр, табиблар, рәссам-артистлар, шагыйрь-шагыйрәләр, гомумән, һәркем чын йөрәктән чыккан фикерләрен җиткерде.
Татарстан телевидениясе ветераннары Эльмира Хамматова, Лия Заһидуллина, Флера Бикмурзина, Лилия Нигъматова, Дания Гаязова, Наилә Яхина, Әнәс Хәсәнов, Индус Сирматов, Хәбир Ибраһимовлар, танылган журналистлар, блогерлар катнашып бәйрәм оештыручыларга үз рәхмәтләрен җиткерделәр. Ифтар мөнәҗәтләр, халык әсәрләре белән үрелеп барды.
Татар халкы юкка гына “Бер очрашу — үзе бер гомер” дип әйтми. Очрашып-күрешүләр, фикер алышулар, фотосүрәткә төшүләр һәркемнең күңелендә озак сакланыр. Казан кооператив институтының Татар мәдәнияте үзәге җитәкчесе Флюра Абдуллина-ифтар мәҗелесен оештырып алып баручы эшен башкарды. Фәннур Хәсәнов, Илдар Гәләветдинов, Татарстан яңалыклары.
