ТАССРның 100 еллыгына һәм Татарстанда игълан ителгән «Туган тел елы»на багышланган республикакүләм «Татар азаны» бәйгесе нәтиҗәләре билгеле. Оештыручылар әлеге конкурсны ел саен уздыру, белгечләр белән бергәләп, азан әйтү өчен, милли мәкамнең 5 вариациясен эшләү һәм аларны Татарстан мәчетләрендә әйтүне тәкъдим итү максатын куйды. Бу турыда Татарстан Диния нәзарәте матбугат хезмәте хәбәр итте.
Балалар арасында абсолют җиңүче булып Теләче районының Олы Мәтәскә авылыннан 12 яшьлек Данияр Нигъмәтҗанов танылды. Аңа велосипед тапшырылды, Корбан бәйрәме көннәрендә Казанның «Рәхмәтулла» мәчетенә ярымай кую тантанасында беренче азанны әйтү хокукына да ия булды. Өлкәннәр арасында I урынны Әлмәттән мөгаллим Илзам Хаҗиев һәм Татарстанның атказанган артисты Марсель Вәгыйзов бүлеште. Танылган диктор, журналист һәм төбәкче Илдар Кыямов белән Алексеевск районыннан имам-хатыйб Рәмис Фәсахов та җиңүчеләр арасында.
