Әтнә районының Иске Өҗем авылы тарихы Казан ханлыгы чорыннан мәгълүм. 1894 елда мулла Фазыл Рәхмәтуллин акчасына ике катлы мәчет һәм мәдрәсә ачылган була. Әмма башка дини белем учаклары кебек мәчет һәм мәдрәсә бинасының манарсын 1917 елда кисеп клуб ясыйлар. Шул елдан башлап авылда иман йорты юкка чыга.
Тарихи хатаны төзәтеп, Иске Өҗем халкы, искесе урынына өр-яңа мәчет төзеп куйды. Шушы көннәрдә иман йортын ачу тантанасы үткәрелде. Әтнә районында мәчетләр саны 36га җитте дип авыл халкының шатлыгын уртаклашы мөфтинең мөхтәсибәтләр белән эшләү буенча киңәшчесе Равил хәзрәт Зөфәров. Иман йортын рәсми ачу чарасында элеккеге мөфти Госман хәзрәт Исхакый да катнашты. “Авыл халкы Рамазан ае алдыннан үзләренә зур бүләк ясаган, ишекләре гел ачык булсын” — дип иң изге теләкләрен ирештерде. Рәсми ачу өлеше тәмамлангач чарада катнашучылар тәкъбир әйтеп мәчеткә юнәлде. Вәгазьләп алганнан соң өр-яңа мәчеттә өйлә намазы укылды.
