Әлфия Авзалова исемендәге фонд халкыбызның җыр сәнгате традицияләрен саклау һәм алга таба да дәвам итү максатыннан оештырылган. Аңа ирешүдә Әлфия Авзалова исемендәге үзәкнең өлеше зур. Мәшһүр җырчыбыз үзәгеннән хәбәрчебез Мөршидә Җиһан репортажы.
Әлфия Авзалова үзәгендә тормыш кайнап тора. Җыр осталыгын арттырыга теләүчеләр остаханәләргә килә, яшь башкаручыларны таныту максатыннан иҗат кичәләре оештырыла. Үзәкнең кечкенә генә сәхнәсе зур иҗатка тәҗрибә туплау мәйданчыгы.
«Су буйлап» җырын башкарып россиякүләм танылу алган Сәйдә Мөхәммәтҗанова Әлфия Авзалова үзәгендә үз кеше. Гел фонд оештырган чаораларда катнаша. Ә бүген ул сәхнә түрендә. Тамашачылары белән очрашты.
Зарыгып көткән чарада аның иҗатташ дусты Башкортостаннан Илнар Шәрәфетдинов та катнашты. Аларның дуэт булып җырлаулары да Әлфия Авзалова исемендәге халыкара фестиваль –конкурстан башланды. Икесе дә фестивальнең беренче дәрәҗәдә лауреаты.
Күңелгә җыр булып килеп кергән яшь җырчылар арасында Сәйдәнең үз урыны бар. Иҗат кичәсенә килә алмаучылар соцаль челтәрләр аша турыдан-туры карады. Тамаша кылучылар арасында Австралия, Индонезиядә кебек илләрдән дә үз фикерләрен язучылар булды. Димәк, башкару осталыгы тиешле дәрәҗәдә булса, җыр тәрҗемәсез дә йөрәккә үтеп керә.
Мөршидә Җиһан, Владимир Юрков Татарстан яңалыклары
