Республиканың югары уку йортларында һәм урта һөнәри белем бирү учрежденияләрендә кабул итү кампанияләре тулы куәтенә бара. Быел коронавирус инфекциясе белән бәйле вәзгыять аркасында, барлык чаралар да дистанцион һәм гадәти форматта үтә. Әле яңа гына мәктәп белән хушлашкан егет-кызлар кайсы һөнәрләгә өстенлек бирә? Түбән Кама районыннан репортаж.
Түбән Каманың политехника көллиятендә тормыш кайный. Абитуриентлар белем бирү йортына укырга керү өчен документлар тапшыра. Марат Мөхәммәтов электр белән тәэмин итү белгечлеген сайлый — бәхет елмайса, әлеге һөнәрне ул бюджетта каралган чараларга үзләштермәкче була.
Түбән Кама политехника көллиятендә студентларны уңышлы укыту өчен бөтен шартлар да тудырыла. Капиталь ремонттан соң, бина танымаслык итеп үзгәрә. Быел шәһәрдә 8 урта һөнәри белем бирү учреждениясе һәм өч югары уку йорты үз ишекләрен ачачак. Алар документларны гадәти һәм онлайн форматта кабул итә — бу эпидемиологик вәзгыятькә бәйле.
Ни куаныч, көллият һәм техникумнарда бюджет урыннары саны күбәйде – быел 2 меңнән артык студент бушлай белем алачак. Яңа уку елын барлык уку йортлары да 1нче сентябрьдә – традицион форматта башларга ниятли.
Альбина Вәлиева, Алия Газалиева, Булат Әбделманов.
