Түбән Камада яңа автобуслар. Пассажирлар йөртү өчен транспортны «Альбатрос» компаниясе сатып алган. Әлегә алар шәһәр маршрутларының берсендә генә йөри. Шәһәр халкы өчен күңелле яңалык, әлбәттә, тик кешеләр фикеренчә, автобуслар җитәрлек түгел. Тулырак киләсе сюжетта.
Төзүчеләр урамындагы тукталыш. Яңа автобус үзенең беренче рейсына юнәлде. Шофер Наил Сафин әйтүенчә, мондый машина белән идарә итү үзе бер рәхәт.
Әлбәттә, яңа автобуслар барлыкка килүгә пассажирлар шат. Әмма, аларның фикеренчә, бу транспорт хәрәкәте проблемасын тамырдан хәл итмәячәк. Кешеләр үзләренә кирәкле маршрутларны көтә.
Автобус йөртүчеләр белән проблема, чыннан да, бар. Әйтик, хәзер тагын ике автобус линиягә чыгарга әзер, тик руль артына утыручылар гына юк. Шуңа күрә әлегә яңа транспорт 1 маршрут буенча гына йөри.
«Альбатрос » ҖЧҖ директоры урынбасары Николай Зуев: «Без шәһәр халкы өчен тырыштык, уртача санда пассажирлар сыярлык ФАЗ класслы ике автобус сатып алдык. Ул экологик чиста ягулык метанда эшли. Автобусларны 59 маршрутка куйдык, чөнки биредә пасса жирлар ташкыны күп. Киләчәктә яңа автобуслар сатып алып, аларны 47 нче маршрутка куярга җыенабыз.»
Барлык автобуслар да ГЛОНАСС системасына тоташтырылган, бәлки тиздән транспорт Яндекс кушымтасында да күренер. Автобусларны сатып алу Түбән Камада дәвам итә торган зур транспорт реформасының бер чарасы. Шәһәр хакимияте вәгъдә иткәнчә, ул киләсе елның 1 кварталында тәмамланачак. Шул ук вакытта зур эшнең нәтиҗәләре дә күренә.
Фәхри Исламов, Татарстан яңалыклары, Түбән Кама.
