Быел республикада мәдәният һәм гореф-гадәтләр елы уңаеннан, аеруча район-авылларда милли рухлы чаралар оештырылып килә. Чираттагысы Түбән Кама районында узган, “Тарихта без эзлебез » дип исемләнгән шәҗәрәләр фестивале. Әлеге бәйгедә район гаиләләре үз сәләтләрен күрсәтте, ягъни нәсел агачларын, милли ашларын тәкъдим иттеләр. Фестиваль мизгелләре- алдагы язмада.
Милли ашларның рецептын Лидия Михайловна әнисеннән язып алган. Аш-су серләренә балаларын, оныкларын да өйрәткән. Башиннар гаиләсе әби-бабаларыннан калган йолаларны үтәп яши. Нәсел шәҗәрәсен дә төзегәннәр.
Чыгыш ясаучы гаиләләрнең һәрберсе – матур бер тарих. Буыннар чылбырын барлап яшиләр. Бер сәхнәдә – әти-әни, әби-бабай, оныклар.
“Тарихта без эзлебез » шәҗәрәләр фестивале уздыру Түбән Камада матур гадәткә кереп бара. Быел 5 нче тапкыр үткәрелә.
Бәйгедә катнашучылар арасында Гайнемөхәммәтовлар да бар. Иҗади гаиләне Түбән Камада гына түгел, республика күләмендә дә беләләр. Бәйгенең зона этабында Түбән Кама данын алар яклаячак.
