Аның иҗат җимешләре Россиядә генә түгел, чит илләрдә дә танылу алган. Сүзебез Чаллы рәссамы Рауза Латыйпова-Иванова турында бара. Түбән Кама шәһәрендә аның шәхси күргәзмәсе ачылды. Биредә оста куллы хатын-кызның 70тән артык картинасы урын алган.Күргәзмә 22 нче мартка кадәр эшлиячәк.
Рауза Иванова-Латыйпованың иң кадерле рәсемнәренең берсе иске сандык, дип атала. Хатын-кыз туган йорты ишегалдын сурәтли. Агачтан ясалган ат башы — төп урынны алып тора. Әлеге сынны аңа Әхсән Фәтхетдинов бүләк иткән. Түбән Каманың мактаулы гражданины истәлегенә ачылган музейда — Чаллыдан килгән рәссамының шәхси күргәзмәсе ачыла.
Россия һәм Татарстан рәссамнар берлеге әгъзасы — натюрморт һәм пейзаж жанрларында эшли, күбрәк — майлы буяулар техникасына өстенлек бирә. Күргәзмәдә аның 70тән артык эше урын алды, алар табигаткә, туган якның матурлыгына багышлана.
Тантанада Рауза Иванова — Латыйпованың дуслары, хезмәттәшләре, Россия һәм Татарстан рәссамнар берлеге әгъзаләре катнашты. Алар алтын куллы хатын-кызга рәхмәтләрен белдереп, түбәнкамалыларны Әхсән Фәтхетдинов музеенда чакырып калдылар. Биредә күргәзмә 22 нче мартка кадәр эшлиячәк.
