Түбән Кама районының Түбән Уратма авылында яшәүчеләр яңартылган мәдәният йортында җыелып, күңел ача башлаячак. Хәзер биредә капиталь ремонт бара. Төзекләндерү эшләре республика программасы буенча башкарыла. Халык бинаның тышкы кыяфәтенең ничек матурлануын күреп, түземсезлек белән ачыласы көнне көтә. Тулырак киләсе язмада.Түбән Уратма авылының мәдәният учагына, ниһаять, яңартылу сәгате сукты – төзүчеләр эчке эшләрне тәмамлап, фасад бизәлешенә тотынды. Эшләрнең 60 проценты инде башкарылган, алдагы планнар — идәннәрне җәю, тузган электр чыбыкларны алмаштыру һәм видеокүзәтү җайланмаларын урнаштыру.Бина танымаслык булып үзгәрәчәк. Концертлар залы гына ни тора. Яңа төс алгач, ул 200 кешене сыйдыра алачак. Мәдинә Ризванова әйтүенчә, мәдәният йорты — Түбән Уратма авылында яшәүчеләр өчен бик кадерле. Менә инде 37 ел, ул халыкның иҗат ялын оештыру белән шөгыльләнә.Халыкны концертлар залы гына түгел, китапханә, тренажерлар, бильярд һәм балалар өчен махсус бүлмә сөендерәчәк — монда һәркем үзенә кызыклы шөгыль таба алачак. Капиталь ремонт республика программасы буенча башкарыла, бу максатларга 15 миллион сум акча бүлеп бирелгән. Яңартылган мәдәният йорты үз ишекләрен көз көнне ачырга тиеш, авылдашлар бу көнне түземсезлек белән көтә.
|
