Түбән Кама районының Покровка-Кызыл Чишмә торак пунктлары арасында боз кичүе ябылды.
Бу хакта республика гадәттән тыш хәлләр министрлыгынан хәбәр иттеләр. Һава температурасының күтәрелүе сәбәпле, Чулман елгасы аша чыгу вакытлыча туктатылды. Бу юл кичүе декабрь аеннан бирле ачык, аннан 3 тоннага кадәр авырлыгы булган автотранспортка чыгу рөхсәт ителде.
Исегезгә төшерәбез, 8 гыйнварда Мамадыш районының Соколка авылы янында рөхсәтсез бозга керү сәбәпле, йөк төялгән фура машинасы суга батты, аның авырлыгы 35 тоннадан артып киткән. Махсус техника ярдәмендә машинаны ярга тартып чыгардылар.
