Кече суднолар дәүләт инспекторлары суда куркынычсызлык кагыйдәләрен тиешенчә үтәргә чакыра. Татарстан министрлар кабинетында узган брифингта әйтелгәнчә, төрле хокук бозулар өчен 50 судно йөртүчегә штраф салынган. Барлыгы 200дән артык судно тикшерелгән. Күбрәк пассажирлар йөртү кагыйдәләрен бозалар.
Җәзаның катгыйлануы турында искәрттеләр. Әйтик коткару жилетлары булмаган өчен штраф 30 тапкыр арткан — хәзер ул 15тән 20 мең сумга кадәр. Республика пляжларында бу эссе көннәрдә су коенучыларга аерым тукталдылар. Әлегә суның җылынган катламының калынлыгы ярты метр чамасы гына булуы әйтелде.
