Татарстан Президенты Рөстәм Миңнеханов Лаеш районында булды. Усады авылында быел августта ачылган балалар бакчасын карады. 260 балага исәпләнгән бакча заманча җиһазландырылган.
Үзәк район хастаханәсе медицина хезмәткәрләре белән очрашуда Рөстәм Миңнеханов хезмәт шартлары, саклагыч костюмнар булуы, Федераль түләүләрнең ничек бирелүе белән кызыксынды.
«Таттехмедфарм» дәүләт даруханә пунктында президентка волонтерлар ярдәмендә коронавирус белән авыручыларны дарулар белән тәэмин итүне оештыру турында сөйләделәр.
Татарстан Президенты Советлар Союзы Герое Борис Кузнецов исемендәге 2-нче номерлы мәктәптә булды — аны кече сыйныф укучыларын бушлай кайнар ашлар белән тәэмин итү проектының ничек тормышка ашырылуы белән таныштырдылар, мәктәп менюсыннан ризыклар ассортиментын күрсәттеләр.
Рөстәм Миңнеханов республиканың биш районында видеоэлемтә режимында тантаналы рәвештә биш спорт объектын ачты. Шуларның берсе- Лаешта.
Республиканың спорт картасында яңа обьект – «Лаеш-Арена» барлыкка килде. Ул райондагы беренче ябык боз сарае. Яшь спортчыларга осталыкларын ныгыту өчен барлык шартлар да бар.
Районда моңа кадәр 17 хоккей мәйданчыгы бар иде. Ә монысы күнегүләр уздыру өчен бик уңайлы.
«Ак Барс» ХК командасы ветераны Вячеслав Андреев: «Элеккеге мәйданннар белән чагыштырсаң. бер сәгать бозны җыештыра, ярты сәгать уйный идек. Хәзер җайлы.»
Арена – күнегүләр уздыруга исәпләнгән, тамашачылар трибунасыннан башка гына. Ачылу хөрмәтенә беренче булып бозны фигуралы шуучылар сынады.
Ачылышта Татарстан Президенты Рөстәм Миңнеханов катнашты. Ул туры элемтә режимында республиканың тагын дүрт районында спорт обьектларын ачты.
Россия Хоккей федерациясе президенты Владислав Третьяк Татарстанның күнегүләр уздыру мөмкинлекләрен онлайн бәяләде.
ТР спорт министры Владимир Леонов: «Быел без инфраструктура төзелеше буенча барлык рекордларны да уздык.3 бассейн, спорт заллары,футбол манежлары ачтык.
Лаеш-Арена » республикадагы 49 нчы хоккей стадионы. Мондый сан белән илнең бер генә төбәге дә мактана алмый. Биредә җирле спорт мәктәпләрендә тәрбияләнүчеләр шөгыльләнә.
Лаеш районы җыелма командасы уенчысы Игорь Иванов: «Районда киләчәктә чемпионнар үсеп чыгар, балаларга үзләрен күрсәтү мөмкинлеге барлыкка килде.»
Бозда беренче булып Лаеш районы һәм «Ак Барс» ветераннары хоккей командалары уйнады. Ул Казан командасы файдасына 10:1 исәбе белән тәмамланды.
Вадим Струминский, Илдар Галәветдинов,Татарстан яңалыклары, Лаеш районы.
